Hevur tú aðrar ella fleiri upplýsingar
Hevur tú aðrar ella fleiri upplýsingar at leggja afturat enn tær, TAKS hevur í verandi løtu á Framskundaðu Skattauppgerðini og Kapitalvinningsuppgerðini, hevur tú skyldu at boða TAKS frá hesum, seinast 15. mars 2010 kl. 24:00.

Hevur tú roknskaparskyldu ella uttanlandsinntøku, er freistin 3. mai 2010 kl. 24:00.

Einfaldasti hátturin at boða frá broytingum er umvegis www.eskatt.fo. Roknskaparskyldug skulu viðleggja roknskapin og ognaruppgerðina í fílu. Hevur tú aðrar viðmerkingar at fráboða í samband við broytingina, skulu tær sendast umvegis 2009@taks.fo.

Havast skal í huga, at tað ikki er møguligt at innlesa upplýsingar um uttanlandsinntøku og tilhoyrandi frádráttir á www.eskatt.fo, men ístaðin verður víst til reyða skjalið – Fylgiskjal til Sjálvuppgávuna.

Fylgiskjal til Sjálvuppgávuna skal sendast inn saman við Sjálvuppgávuni – hesi kunna latast inn umvegis 2009@taks.fo ella sendast við postinum.

Sjálvuppgávan 2009 finst her  
Fylgiskjal til Sjálvuppgávuna 2009 finst her  
Vegleiðing til at geva upp skatt 2009 finst her  

ella við at ringja til TAKS á 352600 og biðja um skjølini.

Sjálvuppgávan 2009 (grøna)
Nøkur hava fingið Sjálvuppgávu 2009 sendandi við forprentaðum upplýsingum, sum arbeiðsgevari, eftirlønarveitari og banki hava latið TAKS. Sjálvuppgávan er send, tí TAKS í verandi løtu er vitandi um, at tú hevur upplýsingar at fráboða á Sjálvuppgávuni.

Legg til merkis: Øll, sum hava fingið eina Sjálvuppgávu, skulu senda hana inn aftur við røttum upplýsingum til TAKS, í seinasta lagi 15. mars 2010 kl. 24:00. Hevur tú roknskaparskyldu og/ella uttanlandsinntøku, er freistin 3. mai 2010.

Um eftirløn
Eftirlønarfrádráttur er forprentaður á Framskundaðu Skattaupgerðina og á Sjálvuppgávuna. Fylgibræv er viðlagt við m.a. nágreiniligum upplýsingum frá eftirlønarveitarum um eftirløn.

Eru ivamál, ella um feilir eru í eftirlønini og eftirlønarfrádráttinum, skalt tú venda tær til eftirlønarveitaran skjótast tilber, sum boðar TAKS frá, um broyting krevst, og tí nýtist tær ikki eisini at fráboða broyting um eftirløn til TAKS.

Um løn og frían ágóða
Somuleiðis skalt tú venda tær til arbeiðsgevaran, um feilur er í lønini ella fríum ágóðum. Arbeiðsgevarin boðar TAKS frá broytingum, og tí nýtist tær ikki eisini at fráboða TAKS um hesar broytingar.

Tað er tín ábyrgd
Tað er altíð tín ábyrgd, at TAKS hevur røttu upplýsingarnar fyri at gera rætta Skattauppgerð. Tí verður tú biðin um at hyggja gjølla eftir øllum forprentaðu upplýsingunum og boða frá á røttum stað, um møguligir skeivleikar eru.

Avlopsskattur
Tey, ið eiga avlopsskatt á Framskundaðu Skattauppgerðini 2009, fáa peningin fluttan á konto 19. februar 2010, og tí ber ikki til at broyta kontonummarið til hetta útgjaldið. Framyvir er avlopsskatturin á konto seinasta arbeiðsdag í triðju viku í hvørjum mánað. Fráboðan um at broyta kontonummar til avlopsskatt skal latast skrivliga til TAKS.