Flytigóðs
Tá tú flytur til Føroya, kanst tú søkja um at fáa flytigóðsið við tær toll- og avgjaldsfrítt.
Søk á Borgaraglugganum
Tað er skjótt gjørt
Tú kanst eisini søkja manuelt
- Heinta skjalið Flytigóðsváttan undir oyðubløðum her á síðuni
- Fyll út og send
- til TAKS á Mínboks
- ella til TAKS, Postboks 2151, 110 Tórshavn
- Saman við manuellu umsóknini skalt tú senda flytiváttan frá kommununi, tú flytur til. Váttanina fært tú frá kommununi.
Treytir fyri toll- og avgjaldsfríum innflutningi av flytigóðsi
Almennar treytir
- Tú skalt hava búð uttanlands í minst eitt ár.
- Tú skalt hava latið útlendska bústaðin frá tær.
- Tú skalt hava átt lutirnar í minst seks mánaðir, áðrenn tú flytur.
- Tú ella húski títt skulu hava brúkt lutirnar hesa tíðina og eisini gera tað eftir flyting.
Ískoytistreytir fyri innflutning av báti og motorakfari
- Tú skalt vera minst 18 ár.
- Tú kanst í mesta lagi flyta inn eitt motorakfar og ein bát.
- Skiftir motorakfarið ella báturin eigara fyrsta árið eftir innflutningin, galda vanligar toll- og avgjaldsreglur. Fyri motorakfarið verður árið roknað frá skrásetingardegnum í Føroyum.
Gev gætur
- Toll- og avgjaldsfríur innflutningur av flytigóðsi er ikki galdandi fyri mat, rúsdrekka og tubbak.
- Rætturin til toll- og avgjaldsfrían innflutning av flytigóðsi fellur burtur eitt ár eftir flyting.
