Útlendingar, ið koma til Føroya at arbeiða

Útlendingar, ið koma til Føroya at arbeiða, skulu rinda til eftirløn.

Arbeiðsgevarin flytur eftirlønargjaldið inn á samansparingina samstundis, sum hann flytur lønina á lønarkontuna. Støddin á eftirlønargjaldinum skal vera í minsta lagi 12% av lønini.

Persónur kann fáa eftirlønarsamansparingina útgoldna, tá uppihaldið í Føroyum endar, treytað av at tað ikki varir longri enn 60 mánaðir.

Hevur persónurin áður fingið afturgjald eftir hesari reglu og kemur aftur til Føroya í tíðaravmarkað starv, verður nýggj eftirlønarsamansparing ikki útgoldin fyrr enn 10 ár eftir, at persónurin fer úr Føroyum aftur.

Søkt verður við oyðublaðnum “Endurrindan av eftirlønargjaldi”. Tú finnur tað undir oyðubløðum her á síðuni.

Tímalønt fáa frítíðarløn 2. mai. Fastlønt fáa 1,5% av lønini saman við apríl-lønini. Tað er umráðandi, at útlendingar, ið eiga frítíðarløn til góðar í Føroyum, ikki strika kontuna, hagar frítíðarpeningurin skal flytast, fyrr enn hann er komin á kontu.

Les meira um frítíðarløn undir leinkjum.

Um arbeiðstíðin er 180 dagar ella minni

Persónar, ið hava inntøku í Føroyum uttan at búgva her í einum tíðarskeiði, sum er 180 dagar ella minni í fylgjandi 12 mánaðir, eru avmarkað skattskyldigir. T.e., at teir rinda skatt í Føroyum av teirri inntøku, sum teir tjena her; men eru annars skattskyldigir í heimlandinum. Inntøka kann vera løn, ágóðar, eftirløn ella samsýning fyri arbeiði, sum gjørt er í Føroyum.

Løntakarar, ið eru avmarkað skattskyldigir, rinda 42% í skatti + 3% í arbeiðsmarknaðareftirløn (AM-gjaldi). Løntakarar, sum sigla við FAS-skipi ella bareboat-skipi, rinda 35% í skatti og einki í arbeiðsmarknaðareftirløn. Er ein avmarkað skattskyldigur, fær ein ikki barnafrádrátt og rentustuðul í Føroyum.

Um arbeiðstíðin er longri enn 180 dagar

Persónar, ið hava inntøku í Føroyum í einum tíðarskeiði, sum er longri enn 180 dagar í fylgjandi 12 mánaðir, eru fult skattskyldigir. T.e., at skattskyldiga inntøkan í Føroyum, og tað, sum ein hevur forvunnið aðrastaðni, skulu gevast upp til skattingar í Føroyum frá tí degi, ein er komin til landið.

Arbeiðir ein eitt longri tíðarskeið í Føroyum, skal ein eisini flyta bústað higar.

Reglurnar um arbeiðsloyvi í Føroyum eru ymiskar og valdast um, úr hvørjum landi, ein kemur.

Norðurlendingar

Borgarar úr Finnlandi, Svøríki, Noregi, Danmark, Íslandi og Grønlandi kunnu frítt koma til Føroya at arbeiða. Teimum nýtist ikki at søkja um arbeiðsloyvi áðrenn.

ES-borgarar

ES-borgarar úr øðrum londum enn Norðurlondum skulu søkja um arbeiðsloyvi til at kunna arbeiða í Føroyum. Umsóknarblað er at finna á heimasíðuni Ny i Danmark, sum er almenni internetportalurin hjá Útlendingastýrinum. Leinki til síðuna er at finna undir leinkjum. Leita t.d. eftir "Færøerne" á síðuni og finn viðkomandi umsóknir.

Borgarar úr øðrum londum

Borgarar úr øðrum londum enn Norðurlondum og ES-londum skulu eisini søkja um arbeiðsloyvi. Umsóknin skal sendast til donsku sendistovuna í tí landi, haðan borgarin kemur. Tað er Udlændingeservice í Keypmannahavn, sum umsitur arbeiðsloyvini. Eisini hetta ber til at lesa meira um á heimasíðuni Ny i Danmark.

Persónar, sum koma til Føroya at arbeiða, skulu hava p-tal fyri at fáa løn útgoldna. P-talið kann fáast frá TAKS. Síggj mannagongd og les meira um evnið við at trýsta á leinkið "P-tal og lønarútgjald" undir leinkjum her á síðuni.

Verður flutt til Føroya í sambandi við tíðaravmarkað starv, og ein hevur fulla skattskyldu her, kann søkjast um undantak at rinda ALS-gjald. Frítøka kann verða givin fyri upp til 1 ár í senn.

Mannagongd

Fyri at verða frítikin frá at rinda ALS-gjald, skal ein senda Arbeiðsloysisskipanini (ALS) eina umsókn saman við avriti av tíðaravmarkaða uppihalds- og arbeiðsloyvinum.

Ring ella skriva til Arbeiðsloysisskipanina fyri at fáa vegleiðing um umsókn og treytir annars. Leinki til Arbeiðsloysisskipanina er at finna undir leinkjum.

Best er at spyrja Útlendingastovuna. Kontaktupplýsingar finnur tú á heimasíðuni hjá Útlendingastovuni, www.utlendingastovan.fo.