Hvat er eftirløn?

Eftirløn av A-inntøku

A-inntøka er inntøka, sum tú fært gjøgnum skattaskipanina, til dømis løn frá arbeiðsplássinum. Skatturin er goldin, tá pengarnir koma á kontu.

Tann, sum rindar tær inntøkuna, skal samstundis gjalda inn til eftirlønina hjá tær. Inngjaldið skal vera í minsta lagi 12% av inntøkuni. Tað kann vera meira, men ikki minni.

Eftirløn av B-inntøku

Av B-inntøku skalt tú eisini rinda 12% í eftirløn. Gjaldsfreistin er 1. november árið eftir inntøkuárið. 

Gjaldið skal setast á kontu hjá einum eftirlønarveitara, sum tú hevur eftirlønaravtalu við. Hevur tú eftirlønarsamansparing av A-inntøku, so kann eftirlønargjaldið av B-inntøkuni setast á hesa kontu.

B-inntøka er inntøka, sum tú ikki fært gjøgnum skattaskipanina, til dømis upphæddir í sambandi við húsaleigu, egið virki, fríar ágóðar ella uttanlandshýru. Skatturin er ikki goldin, tá pengarnir koma á kontu.

Rindar arbeiðsplássið hjá tær meira enn 12% í eftirløn?

So kanst tú rinda tað minni av B-inntøkuni. Í summum førum dekkar inngjaldið frá A-inntøkuni longu alt, so tær ikki nýtist at rinda meira.

Treytir

• Eftirløn kann ikki takast út í úrtíð.
  Hon kann heldur ikki veðsetast ella mótroknast í peningakravi.
• Eftirløn er partur av felagsbúgvi hjá hjúnum.
  Við hjúnaskilnað verða eftirlønirnar hjá hjúnunum javnbýttar. Lívrenta er tó ikki partur av felagsbúnum.

Undantøk

• Tænastumenn skulu ikki rinda til eftirløn sambært eftirlønarlógini.
  Inntøkan skal vera forvunnin í tænastumannastarvinum.
• Lesandi uttanlands skulu ikki rinda til eftirløn sambært eftirlønarlógini.
  Inntøkan skal vera forvunnin  uttanlands, og full skattskylda skal vera í Føroyum.
• Ymisk útgjøld eru ikki fevnd av eftirlønarkravinum.
  Dømi eru almannapensjón, lutaeftirløn, lívrenta, legat og eydnuspælsvinningar.

> Síggj øll undantøkini í § 3 í eftirlønarlógini

Tú fært tær eina eftirlønarsamansparing við at seta teg í samband við ein eftirlønarveitara. Hann gevur tær eitt kontunummar, sum inngjøldini kunnu setast inná.

Eftirlønarveitarin kann vera ein peningastovnur, ein eftirlønargrunnur ella eitt lívtryggingarfelag. Hann skal hava heimstað í Føroyum.

Eftirløn er ofta partur av setanarsáttmálanum hjá tær

Tá hevur tú longu eina eftirlønarsamansparing og nýtist ikki at stovna eina afturat.

Í summum setanarsáttmálum verður inngjaldið býtt millum arbeiðsgevara og starvsfólk. Tað er tó arbeiðsgevarin, sum umsitur og avgreiðir eftirlønina.

Vit vegleiða fegin

• Ring til kundatænastu okkara á 35 26 00 mánadag til hósdag millum 10 og 12 ella skriva til taks@taks.fo

• Tú kanst eisini bíleggja eitt svar, og vit ringja teg upp aftur, tá tú hevur tíð