Lurta

Fiskiveiðufrádráttur

Ert tú við fiskiskipi, hevur tú rætt til frádrátt á 14% av samlaðu hýruni upp til 470.000 krónur (til og við 2023). Fer samlaða hýran uppum, rindar tú fullan skatt av tí partinum. Fiskiveiðufrádráttur verður eisini kallaður fiskimannafrádráttur og útróðrarfrádráttur.

Frá 1. januar 2024 minkar frádrátturin stigvíst:
Fyri 2024 er frádráttur á 14% av samlaðu hýruni upp til 400.000 kr.
Fyri 2025 og frameftir er frádráttur á 14% av samlaðu hýruni upp til 300.000 kr.

Soleiðis roknar tú frádráttin

Fyri at rokna frádráttin, mást tú fyrst rokna nettoveiðuna og samlaðu hýruna.

Nettoveiðan er tað, sum tú selur fyri í eitt ár ÷ beinleiðis útreiðslur, t.e. útreiðslur til sølu, olju, agn og egning. Rør onkur út saman við tær, er hýran til tann persónin eisini beinleiðis útreiðsla. Samlaða hýran er grundhýran + 12% í frítíðarløn + 10% afturat.

Vit rokna eitt dømi, har tú ert einsamallur við bátinum og hevur selt fyri 500.000 krónur:

Fyrst rokna vit nettoveiðuna
Selt fyri:500.000
  søluútreiðslur÷ 50.000
  oljuútreiðslur÷ 80.000
  agnútreiðslur÷ 12.000
  egningarútreiðslur÷ 83.000
Nettoveiða:275.000

 

So samlaðu hýruna
Grundhýra (45% av nettoveiðu):*123.750
  frítíðarløn, 12%+ 14.850
Grundhýra við frítíðarløn:138.600
  10% av nettoveiðu til skipara, motorpassara og bestamann**+ 27.500
Samlað hýra:166.100

 

Og at enda fiskiveiðufrádráttin
Fiskiveiðufrádráttur (14% av samlaðu hýruni):23.254

 

*) Sambært § 25a, stk. 4, nr. 2, 1. pkt., í skattalógini eru 45% + frítíðarløn tað mesta, ið kann lutast manningini av nettoveiðuni. Dømið nýtir henda prosentpart, men reiðarin kann áseta, at parturin skal vera minni.

**) 10% er sambært § 25a, stk. 4, nr. 2, 2. pkt., í skattalógini.

Soleiðis førir tú frádráttin inn í roknskapin

Set samlaðu hýruna undir útreiðslur sum løn/hýru og legg 86% av grundhýruni aftur at ársúrslitinum at flyta til sjálvuppgávuna. Brúkar tú roknskaparleistin hjá TAKS fyri útróður, er talan um teig 48 (Løn/hýra) og teig 86 (Ársúrslit at flyta til sjálvuppgávuna).

Ikki hoyrt um roknskaparleistin hjá TAKS fyri útróður?

Hann er fínur at gera roknskapin við, um eingin bókhaldari er at heita á. Fyll hann út beinleiðis á Borgaraglugganum ella heinta hann her á síðuni undir snarslóðum. Set tølini inn, goym á telduni og lat inn á Borgaraglugganum saman við sjálvuppgávuni.

Síggj videovegleiðingar, hvussu tú fyllir út

TAKS hevur gjørt ymsar roknskaparleistir, og tveir hava videovegleiðingar. Tað eru leisturin fyri húsaleigu og leisturin uttan løn og avskriving. Roknskaparleisturin fyri útróður skal útfyllast tilsvarandi, so hygg at vegleiðingunum, um tú ivast. Tær liggja undir snarslóðum.

Ivast tú í onkrum um fiskiveiðufrádrátt?

Ring til kundatænastu okkara á 35 26 00 mánadag til hósdag millum 10 og 12 ella skriva til taks@taks.fo. Vit vegleiða fegin.

Tú kanst eisini bíleggja eitt svar, og vit ringja teg upp aftur, tá tú hevur tíð.