• Ein skal hava búð í Føroyum, áðrenn ein flutti til Danmarkar.
• Ein skal uppihalda sær í Danmark fyribils í lestrarørindum.
• Ein skal ikki hava kompetansugevandi útbúgving frammanundan.
• Ein skal ikki hava uppihildið sær í Danmark í meira enn seks mánaðir, áðrenn lestur byrjar.

Upp í seks mánaða tíðarskeiðið verður ikki roknað tann tíð, sum verður nýtt í sambandi við fyrireikandi skeið, sum útbúgvingarstovnur treytar fyri at kunna byrja lesnaðin. Henda tíð kann tó vara í mesta lagi eitt ár.

Søkja hjún inn á útbúgvingarstovn, og bert annað verður upptikið, so verður seks mánaða reglan tikin úr gildi, hvat viðvíkir hinum hjúnafelaganum, tó í mesta lagi í tvey ár.

Gev gætur, at føroyafrádráttur kann bert nýtast til arbeiðsinntøku, og ein rindar vanligan skatt av SU. Ein hevur rætt til føroyafrádrátt, so leingi ein lesur, tó í mesta lagi ásettu lestrartíð + tvey ár.

Upphæddin á føroyafrádráttinum broytist frá ári til ár. Verður bert lisið part av árinum, verður frádrátturin lutfalsliga minni. Flytir ein t.d. til Danmarkar 1. september og byrjar at lesa tá, verður frádrátturin 4/12 av fullu upphæddini.

8 prosent skulu gjaldast í AMB (Arbejdsmarkedsbidrag) av allari arbeiðsinntøkuni.

Tá søkjast skal um føroyafrádrátt, skal ein venda sær til uttanlandsdeildina á skattasentrinum, har ein býr. Har skal ein boða frá:

• at ein er føroyingur undir útbúgving,
• at ein hevur inntøku, sum ein søkir føroyafrádrátt av,
• at ein ætlar sær heim til Føroya eftir loknan lestur.

Tað er umráðandi at kunna vísa lestrarkort, lærusáttmála ella annað skjalprógv fyri, at ein er lesandi. Søkjast skal um føroyafrádrátt á hvørjum ári.