Skriva út

Lærlingafrádráttur

Lærlingafrádráttur er ein árlig upphædd á upp til 50.000 krónur, sum verður drigin frá skattskyldigu inntøkuni hjá lærlingum, áðrenn skatturin verður roknaður.

Er lærutíðin byrjað áðrenn 2024, fær man frádráttin sjálvvirkandi, um Yrkisdepilin hevur góðkent lærusáttmálan. Er hon byrjað í 2024 ella seinni, skal man søkja um hann. Les um tað niðanfyri í partinum "Hvussu fær man frádráttin".

Treytir fyri at fáa lærlingafrádrátt

Til at fáa lærlingafrádrátt skal man vera lærlingur.

Tað er, at man antin skal arbeiða eftir galdandi lærusáttmála, sum Yrkisdepilin hevur góðkent, ella eftir sáttmála, har útbúgvingin er skipað og lønt sambært avtalu millum fakfelag og arbeiðsgevara á føroyska arbeiðsmarknaðinum.

Gev gætur

Er starvsvenjing partur av útbúgvingini, verður man ikki roknaður sum lærlingur. Sum dømi kunnu nevnast lærarar, námsfrøðingar og sjúkrarøktarfrøðingar. Hesi fáa ikki frádrátt, tí tey eru ikki fevnd av einum lærusáttmála.

Fevnir lærutíðin um part av inntøkuárinum, verður frádrátturin minkaður samsvarandi. Hetta kann til dømis vera, um læran byrjar ella endar mitt í árinum.

Hvussu fær man frádráttin?

Um lærutíðin er byrjað áðrenn 2024

Frádrátturin verður skrásettur sjálvvirkandi, um Yrkisdepilin hevur góðkent lærusáttmálan. Um so er, skal man einki gera.

Um lærutíðin er byrjað í 2024 ella seinni

Man skal søkja um frádráttin. Tað kann gerast upp á tveir mátar:

  1. Á Borgaraglugganum: Vel Skattur > Fyribilsskattaskráseting > Fyribilsskattaskráseting 2024. Vel byrjanardag og endadag fyri lærutíð niðast á hesi síðu, viðfest lærusáttmála og send.
  2. Manuelt: Fyll út og send okkum “Umsókn um lærlingafrádrátt.” Heinta hana undir oyðubløðum her á síðuni. Minst til at leggja lærusáttmála saman við umsóknini.

Hvar sæst frádrátturin?

Frádrátturin sæst á Borgaraglugganum. Vel Skattur > Fyribilsskattaskráseting > Fyribilsskattaskráseting 2024. Upphæddin stendur undir “Roknaður frádráttur” niðast á síðuni.

Fyri farin ár sæst lærlingafrádrátturin á skattauppgerðunum. Vel Skattur > Skattauppgerðir.

Um broytingar henda í lærutíðini

Henda broytingar í lærutíðini, t.d. at man fer í barsil, farloyvi, skiftir lærupláss ella gevst við læruni, skal man boða TAKS og Yrkisdeplinum frá hesum, alt eftir hvønn sáttmála, man hevur.

Lærlingar, ið ikki hava sáttmála, sum Yrkisdepilin hevur góðkent, skulu boða TAKS frá

Send boðini við teldubrævi til TAKS á taks@taks.fo. Skiftir man lærupláss, skal TAKS eisini hava nýggja umsókn um lærlingafrádrátt.

Dømi um lærlingafrádrátt

Við lærlingafrádráttinum verður meira eftir av lønini eftir skatt, millum 1.000 og 2.000 krónur um mánaðin, alt eftir inntøku. Talvan niðanfyri vísir dømi um lærlingafrádrátt fyri ymiskar inntøkur. (Kelda: Uppskot til løgtingslóg um broyting í løgtingslóg um landsskatt og kommunuskatt.)

Skattskyldig inntøka75.000100.000150.000200.000300.000400.000
Frádráttur50.00050.00050.00050.00050.00050.000
Skattskyldig inntøka eftir frádrátt25.00050.000100.000150.000250.000350.000
Sparing í landsskatti1.5005.2507.5007.50010.00012.500
Sparing í kommunuskatti9.08610.09510.09510.09510.09510.095
Sparing í kirkjuskatti270300300300300300
Sparing í gjaldi til Heilsutrygd300300300300300300
Sparing í gjaldi til AMEG1.5001.5001.5001.5001.5001.500
Skattalætti um árið12.65617.44519.69519.69522.19524.695
Skattalætti um mánaðin1.0551.4541.6411.6411.8502.058