Rindar persónur ikki krav innan ásetta freist, sendir TAKS honum eitt áminningarskriv um eftirstøðuna. Hetta er skjal, ið lýsir slag og stødd á eftirstøðu, og hvørjar fylgjurnar eru, um hon ikki verður goldin. Ger persónurin ikki vart við seg innan 10 dagar eftir at hava móttikið áminningarskrivið, verður málið sent pantifútunum hjá TAKS til innheintingar.

Rindar persónurin framvegis ikki skuldina innan rímiliga tíð, senda pantifútarnir hjá TAKS honum komuboð. Er talan um álvarsliga skuld, verða tey send beinanvegin.

Komuboð er bræv við boðum um at møta ávísan dag, vanliga á næstu TAKS-skrivstovu. Í brævinum er eisini tilskilað, hvussu nógv, ein skyldar, og hvat ið hendir, um ein ikki møtir, tí møtiskylda er.

Tá ið møtt verður, verður fyrst spurt, um ein kann gjalda eftirstøðuna. Kann og ger ein tað, verður ikki meira gjørt við málið.

Kann ein ikki tað, verður farið víðari við málinum.

Kann skuldarin ikki gjalda, verður pantað í ogn hansara, t.d. í tøkum peningi, fastogn, akfari, innbúgvi ella øðrum. At ein ogn er pantað merkir, at hon kann ikki seljast ella avhendast uttan við góðkenning frá panthavaranum, í hesum føri TAKS.

Er eingin ogn, ella er hon ov lítil til at panta, kann talan gerast um úrslitaleysa útpanting. Eins og panting hevur úrslitaleys útpanting við sær, at fyrningarfreistin hjá kravinum verður brotin, og tað fyrnast hereftir vanliga fimm ár eftir útpantingina. Nýggj útpanting brýtur aftur hesa fyrningarfreist.

Í serligum førum verður pantað á bústaðnum hjá skuldaranum, t.d. um hann ikki møtir til komuboð, ella um vandi er fyri, at hann selur ella avhendir virðir aðrar vegir. Í seinna føri kann verða pantað, uttan at komuboð verða send.