Kapitalvinningssjálvuppgáva

Ein kapitalvinningssjálvuppgáva er eitt oyðublað, sum tú sendir TAKS við upplýsingum um, hvørt tú seldi virðisbrøv síðsta ár, og hvat tú hevði í vinningi og tapi av søluni. Út frá hesum roknar TAKS, hvussu nógv tú skalt rinda í kapitalvinningsskatti.

Lata inn kapitalvinningssjálvuppgávu skal tann, sum:

• seldi virðisbrøv síðsta ár ella sum
• vil rætta kapitalvinningsuppgerð sína fyri 2025

Hoyrir tú ikki til ein av hesum bólkum, skalt tú ikki lata inn kapitalvinningssjálvuppgávu.

TAKS sendir tær bræv, tá klárt er at lata kapitalvinningssjálvuppgávuna inn

Brævið kemur:

• í Borgaragluggan 3. mars
• í Mínboks 4. mars
• í postkassan 9.-13. mars

Í postkassan kemur tað bert, um tú ikki brúkar Mínboks.

Soleiðis gert tú

• Rita inn á gluggan
• Vel Sjálvuppgávan > Kapitalvinningsuppgerðir > Fyll út kapitalvinningssjálvuppgávu
• Fyll út og viðheft viðkomandi skjøl
• Lat inn

Kanst tú ikki nýta Borgaragluggan, kanst tú lata inn manuelt

• Heinta skjalið Kapitalvinningssjálvuppgáva 2025 undir oyðubløðum her á síðuni
• Fyll út og viðheft viðkomandi skjøl
• Lat inn:
  • við teldubrævi til taks@taks.fo ella
  • við vanligum brævi til TAKS, Postboks 2151, 110 Tórshavn

Frádráttur fyri tap

Tap av virðisbrøvum kann bert dragast frá kapitalvinningsskatti, ikki frá persónsskatti. Hevur tú tap, men ongan kapitalvinningsskatt at draga tað frá, kanst tú flyta tapið fram til komandi ár. Tað er eingin tíðaravmarking, og tú kanst flyta tað, til alt tapið er brúkt.

Tap kann koma, tá tú selur virðisbrøv fyri minni, enn tú keypti tey fyri, ella tá virðisbrøvini verða niðurskrivað. Hevur tú keypt í fleiri umførum, veldst úrslitið um, nær og fyri hvønn prís tú keypti. Minnist tú ikki keypsprísin, kanst tú fáa upplýsingarnar frá peningastovninum, har tú keypti brøvini.

Frádráttur fyri rentur

Hevur tú fíggjað virðisbrøv við láni, sum er tikið áðrenn 1. januar 2017, kanst tú draga renturnar frá í kapitalvinningssjálvuppgávuni. Hevur tú fleiri rentuútreiðslur, enn tú kanst nýta í ár, kanst tú flyta restina fram til næsta ár í upp til fimm ár.

Tú kanst gera broytingar trý ár aftur

Vilt tú broyta kapitalvinningssjálvuppgávuna, skalt tú lata nýggjar upplýsingar inn innan trý ár eftir lokið inntøkuár. Hevði tú til dømis tap í 2023, skalt tú lata upplýsingarnar inn í seinasta lagi 31. desember 2026.

Sama er við rentuútreiðslum. Eru útreiðslurnar fyri eitt ár ikki skrásettar aftan á trý ár, fellur frádráttarrætturin fyri hetta árið burtur.

Innlatingarfreistin er 4. mai 2026

Tað kann geva sekt og meirskatt, um tú letur inn ov seint ella ikki tekur alla inntøku við. Hetta er sambært §§ 100 og 139 í skattalógini.

Tú kanst søkja um longda innlatingarfreist

Tað skal vera ein serlig orsøk, eitt nú sjúka, og tú mást ikki skylda aðrar sjálvuppgávur. Send eina skrivliga umsókn til TAKS, Postboks 2151, 110 Tórshavn ella til taks@taks.fo.

Freistin er 27. apríl 2026. Tá skal brævið vera framkomið. Sendir tú við vanligum brævi, kunnu fimm dagar ganga, áðrenn tað kemur fram, so send í góðari tíð.

Útlendskir peningastovnar lata ikki TAKS upplýsingar um sølu av virðisbrøvum, soleiðis sum føroyskir peningastovnar gera. Eigur tú virðisbrøv í útlendskum peningastovni og seldi í fjør, hevur tú skyldu at lata inn kapitalvinningssjálvuppgávu og upplýsa um vinning ella tap.

Gev viðkomandi eina fulltrú til at nýta tín Borgaraglugga. Tú kanst geva hana á Borgaraglugganum ella við brævi.

Á Borgaraglugganum

• Rita inn á gluggan
• Vel Grundupplýsingar/fulltrúir > Fulltrúir
• Fyll út og send

Freistin er 4. mai 2026.

Við brævi

• Heinta fulltrúina
• Fyll út og send:
  • við teldubrævi til taks@taks.fo ella
  • við vanligum brævi til TAKS, Postboks 2151, 110 Tórshavn

Freistin er 27. apríl 2026. Tá skal brævið vera framkomið. Sendir tú við vanligum brævi, kunnu fimm dagar ganga, áðrenn tað kemur fram, so send í góðari tíð.

Hygg í vegleiðingina at geva upp skatt

• Heinta vegleiðing

Hygg í vegleiðingina at geva upp vinning og tap av partabrøvum

• Heinta vegleiðing

Spyr kundatænastu okkara

• Ring 35 26 00 ella kom inn á gólvið á Smyrilsvegi 20 í Havn. Avgreiðslutíðin er mánadag til hósdag millum 10 og 12.

Tú kanst eisini altíð

• skriva til taks@taks.fo,
• bíleggja eitt svar og fáa okkum at ringja teg upp aftur,
• spyrja Eyð Eið, kjattbottin hjá TAKS. Klikk á hana niðast til høgru á síðuni. Gev gætur, at svarini hjá Eyð Eið eru vegleiðandi. Spyr kundatænastuna, um tú ivast.