Ofta spurt um sjálvuppgávu

Nær verður avlopsskatturin útgoldin?

Svar: Avlopsskatturin verður útgoldin 23. mars.

> Vilt tú broyta kontunummarið til avlopsskattin?

Kann eg ringja til TAKS fyri at vita, um eg fái pengar aftur í skatti?

Svar: Nei.

Av trygdarávum útflýggjar TAKS ikki slíkar upplýsingar, hvørki um telefon ella teldupost.

Upplýsingarnar liggja á Borgaraglugganum og í Mínboks. Hevur tú ikki Mínboks, fært tú bræv í postkassan ein av døgunum frá 9. til 13. mars.

Kann eg broyta kontunummarið til avlopsskattin?

Svar: Ja.

Ger tað við telduposti ella á Borgaraglugganum.

Við telduposti er freistin 15. mars á midnátt

• Skriva nýggja kontunummarið á eitt skjal og skriva undir
• Skanna ella avmynda skjalið og send til taks@taks.fo

Á Borgaraglugganum er freistin 19. mars klokkan 16

• Rita inn á Borgaragluggan
• Vel Grundupplýsingar/fulltrúir > Kontaktupplýsingar > Broyt peningastovnskontu
• Fyll út og send

Hví fái eg ikki barnafrádrátt fyri barn, sum er farið á skúla uttanlands?

Svar: Tað kann vera tí, at barnið hevur ikki søkt um at varðveita fulla skattskyldu í Føroyum.

> Les um at varðveita fulla skattskyldu í Føroyum

Hví fái eg ongan barnafrádrátt útgoldnan?

Svar: Tí at barnafrádráttur er ikki peningur, sum tú fært á kontu. Tað er ein upphædd, sum verður drigin frá skattinum, sum tú annars skuldi rindað.

Dømi:

Hevur tú barnafrádrátt upp á 40.000 kr. og skuldi havt rindað 50.000 kr. í skatti, so fært einki útgoldið, men rindar bara 10.000 kr. í skatt.

Barnafrádráttur verður einans útgoldin, um frádrátturin er størri enn skatturin. Hevur tú til dømis barnafrádrátt upp á 40.000 kr. og skatt upp á 30.000 kr., so fært 10.000 kr. útgoldnar og rindar ongan skatt.

> Les um barnafrádrátt

Hvussu gevi eg fulltrú til Borgaragluggan?

Svar: Tú gevur hana á Borgaraglugganum ella við brævi.

• Á Borgaraglugganum: Rita inn og gev fulltrúina undir grundupplýsingar/fulltrúir > fulltrúir. Freistin er 4. mai.
• Við brævi: Heinta fulltrúina, fyll út og send. Freistin er 27. apríl. Tá skal brævið vera framkomið. Fimm dagar kunnu ganga, áðrenn útborið verður, so send í góðari tíð.

Hvat kann Borgaragluggin brúkast til?

Svar: Borgaragluggin kann brúkast til so nógv. Sjálvuppgávur, skattauppgerðir og umsóknir eru eitt av mongum, og man sær eisini upplýsingar um seg, til dømis løn, eftirløn og frítíðarløn.

> Fortel meira um Borgaragluggan
> Skal onkur orðna sjálvuppgávuna fyri teg á Borgaraglugganum?

Hvussu riti eg inn á Borgaragluggan?

Svar: Tú ritar inn á Borgaragluggan við Samleikanum.

Les meir um hann á samleikin.fo. Ivast tú í onkrum, ring til Talgildu Føroyar á 1881 mánadag til fríggjadag millum klokkan 8.00 og 16.30 ella skriva til 1881@talgildu.fo.

> Rita inn á Borgaragluggan

Nær eru ymsu freistirnar í sambandi við sjálvuppgávuna?

Svar: Niðanfyri eru allar freistir í sambandi við sjálvuppgávuna 2025.

15. mars 2026:

• Síðsta freist at broyta kontunummarið til avlopsskattin við telduposti.

19. mars 2026 klokkan 16:

• Síðsta freist at broyta kontunummarið til avlopsskattin á Borgaraglugganum.

27. apríl 2026:

• Síðsta freist at geva fulltrú til Borgaragluggan við brævi. Henda dagin skal brævið vera framkomið. Fimm dagar kunnu ganga, áðrenn útborið verður, so send ikki seinni enn 14. apríl.

4. mai 2026:

• Síðsta freist at geva fulltrú til Borgaragluggan á Borgaraglugganum.
• Síðsta freist at lata inn sjálvuppgávu.
• Síðsta freist at lata inn roknskap.
• Síðsta freist at lata inn kapitalvinningssjálvuppgávu.
• Síðsta freist at lata inn ognaruppgerð.

Hvussu gevi eg fulltrú til Borgaragluggan?

Svar: Tú sendir hana til TAKS á Borgaraglugganum ella við brævi.

• Á Borgaraglugganum: Rita inn á gluggan og gev fulltrúina undir grundupplýsingar/fulltrúir > fulltrúir. Freistin er 4. mai.
• Við brævi: Heinta fulltrúina, fyll út og send. Freistin er 27. apríl. Tá skal brævið vera framkomið. Fimm dagar kunnu ganga, áðrenn útborið verður, so send í góðari tíð.

Hvat er ein fulltrú, og hvussu virkar hon?

Svar: Ein fulltrú er eitt loyvi, sum tú gevur einum øðrum persóni til at umboða teg í eini ávísari støðu. Í hesum føri gevur tú viðkomandi loyvi til at brúka tín Borgaraglugga at fylla út sjálvuppgávuna hjá tær og lata hana inn fyri teg.

Fulltrúin merkir, at tann, tú gevur hana til, fær atgongd til tína Borgaraglugga og kann síggja somu upplýsingar sum tú og gera tað sama, sum tú kanst.

Tú kanst velja, um fulltrúin skal galda í eitt, tvey ella trý ár.

> Skal onkur orðna sjálvuppgávuna fyri teg á Borgaraglugganum?

Hvat er ein kapitalvinningssjálvuppgáva?

Ein kapitalvinningssjálvuppgáva er eitt oyðublað, sum tú sendir TAKS við upplýsingum um, hvørt tú seldi virðisbrøv síðsta ár, og hvat tú hevði í vinningi og tapi av søluni. Út frá hesum roknar TAKS, hvussu nógv tú skalt rinda í kapitalvinningsskatti.

Skalt tú lata inn kapitalvinningssjálvuppgávu, fært tú bræv um tað frá TAKS í mars. Brævið kemur í Borgaragluggan, Mínboks ella postkassan.

> Les um kapitalvinningssjálvuppgávu

Hvat er ein kapitalvinningsuppgerð?

Svar: Ein kapitalvinningsuppgerð er eitt yvirlit yvir upplýsingar, sum TAKS hevur um skattaviðurskifti tíni í sambandi við rentuinntøkur, vinningsbýti, virðisbrøv o.a. síðsta ár. Tú fært uppgerðina frá TAKS í mars. Hon kemur í Borgaragluggan, Mínboks ella postkassan.

> Les um kapitalvinningsuppgerð

Hvat skal eg gera við kapitalvinningsuppgerðina?

Svar: Tú skalt kanna, um uppgerðin er røtt.

• Er hon røtt, skalt tú ikki gera meira, tí so rindar tú rættan skatt
• Er hon skeiv, skalt tú broyta hana á Borgaraglugganum og senda hana aftur til TAKS

> Les um kapitalvinningsuppgerð

Eg eri ikki limur í fólkakirkjuni. Hví rindi eg kirkjuskatt?

Svar: Vanliga er orsøkin, at TAKS ikki hevur fingið boð um, at tú ikki ert limur.

Um tú ikki skalt rinda kirkjuskatt, mást tú fáa eina váttan um, at tú ikki ert fólkakirkjulimur. Tað gert tú við at venda tær til prestin í tí prestagjaldi, har tú búði, tá tú vart doyptur. Tá tú hevur fingið váttanina, send hana til taks@taks.fo ella við vanligum brævi til TAKS, Smyrilsvegur 20, Postboks 2151, 110 Tórshavn.

Skriva, at tú ikki skalt rinda kirkjuskatt, so avgreiða vit tað.

> Prestagjøld í Føroyum (folkakirkjan.fo)

Nær broytist kommunuskattaprosentið, um eg flyti kommunu?

Svar: Tað veldst um, nær tú flytur.

• Er tað áðrenn 1. desember, rindar tú skattaprosentið í tilflytingarkommununi árið eftir.
• Er tað 1. desember ella seinni, rindar tú skattaprosentið í fráflytingarkommununi árið eftir.

Vit siga, at í 2026 flytur tú kommunu; frá kommunu A til kommunu B. Í kommunu A er kommunuskatturin 20%, í kommunu B er hann 18%.

• Flytur tú áðrenn 1. desember, rindar tú 18% í kommunuskatti í 2027.
• Flytur tú 1. desember ella seinni, rindar tú 20% í kommunuskatti í 2027.

Skal íbúðin í Danmark upp á sjálvuppgávuna í Føroyum?

Svar: Nei.

Tað er ikki ognarskattur í Føroyum, so íbúðir, hús og aðrar ognir, sum man eigur uttanlands, skulu ikki upp á sjálvuppgávuna her. Hava tey ognarskatt í landinum, har ognin er, so skal hon hinvegin upp á sjálvuppgávuna í tí landinum. Ognarskattur er til dømis í Danmark, so íbúðin skal á donsku sjálvuppgávuna. Vend tær til donsku skattamyndugleikarnar um tað.

Hvat er ein ognaruppgerð?

Svar: Ein ognaruppgerð er eitt yvirlit yvir ognir tínar, og hvat tær eru verdar. Til dømis hús, virðisbrøv, akfør og virðismikil listarverk.

> Les um ognaruppgerð

Hvør skal lata inn ognaruppgerð?

Lata inn ognaruppgerð skal tann, sum:

• hevur roknskaparskyldu
• hevur ognir, og ikki hevur latið inn ognaruppgerð áður
• hevur havt broytingar í ognum sínum í mun til seinast innlatnu uppgerð

> Les um ognaruppgerð

Skal eg altíð lata inn roknskap, um eg havi einstaklingsvirki?

Svar: Ja.

Hevði tú eitt virkið v-tal í 2025, skalt tú lata inn roknskap, sjálvt um inntøkan var null. Roknskapurin skal tastast inn á Borgaraglugganum og latast inn saman við sjálvuppgávuni.

> Les um roknskap

Hvat er ein sjálvuppgáva?

Svar: Ein sjálvuppgáva er eitt oyðublað, sum tú sendir TAKS við upplýsingum um inntøku og frádrátt farna árið. Út frá hesum roknar TAKS, hvussu nógv tú skalt rinda í skatti.

Skalt tú lata inn sjálvuppgávu, fært tú bræv um tað frá TAKS í mars. Brævið kemur í Borgaragluggan, Mínboks ella postkassan.

> Les um sjálvuppgávu

Hví havi eg fingið sjálvuppgávu, tá ið eg onga B-inntøku hevði í fjør?

Svar: Tað kann vera tí, at tú hevði B-inntøku í fyrraárið. Tá fært tú automatiskt sjálvuppgávu, tí gingið verður út frá, at inntøkan hevur hildið áfram. Hevur hon ikki tað, skalt tú lata inn sjálvuppgávu og einki skriva í hana.

Soleiðis gert tú:

1. Rita inn á Borgaragluggan
2. Vel sjálvuppgávan 2025 > Fyll út sjálvuppgávu
3. Skriva einki í hana
4. Lat inn

Um nakrar dagar fær tú sendandi eina skattauppgerð. Vísir hon rætt, er málið liðugt.

Nær skal sjálvuppgávan latast inn?

Svar: Sjálvuppgávan skal latast inn í seinasta lagi 4. mai 2026.

Hvat er ein skattauppgerð?

Svar: Ein skattauppgerð er eitt yvirlit yvir upplýsingar, sum TAKS hevur um skattaviðurskifti tíni síðsta ár. Tú fært uppgerðina frá TAKS í mars. Hon kemur í Borgaragluggan, Mínboks ella postkassan.

> Les um skattauppgerð

Hvat skal eg gera við skattauppgerðina?

Svar: Tú skalt kanna, um hon er røtt.

Ein røtt skattauppgerð vísir alla inntøku og allan frádrátt, sum tú hevði í farna ári.

• Er uppgerðin røtt, skalt tú ikki gera meira, tí so rindar tú rættan skatt
• Er uppgerðin skeiv, skalt tú broyta hana og senda hana aftur til TAKS

> Les um skattauppgerð

Hvar finni eg skjøl til sjálvuppgávuna?

Svar: Á Borgaraglugganum og á taks.fo.

Á Borgaraglugganum liggja tey klár at fylla út og senda talgilt. Rita inn og finn tey undir Sjálvuppgávan 2025.

Á taks.fo finnur tú tey undir sjálvuppgávuskjølum og á viðkomandi evnissíðum.

> Rita inn á Borgaragluggan
> Far til sjálvuppgávuskjøl

Rindar man skatt av at selja ein haruhaga?

Svar: Ja, sannlíkt.

Er talan um, at rætturin til at skjóta haru í haganum ikki verður endaliga avhendur uttan latin øðrum at nýta móti gjaldi, so er talan um útleigu, og vinningurin av slíkari er altíð skattskyldigur. Er talan um veruliga sølu, har rætturin til at skjóta haru í haganum verður endaliga avhendur, so veldst skatturin um, hvørt jørðin av fyrstan tíð varð keypt við vinningi fyri eyga ella ikki. Var tað við vinningi fyri eyga, so er sølan av haruhaganum skattskyldig. Varð tað ikki við vinningi fyri eyga, so er sølan av haruhaganum skattafrí.

> Les um skatt av jørð og lunnindum

Rindar man skatt av at selja eina heimabundna troyggju?

Svar: Tað veldst um.

Selur man heimabundið, og árligi umsetningurin ikki fer upp um 50.000 krónur, so rindar man ikki skatt av tí. Fer árligi umsetningurin upp um 50.000 krónur, skal skattur rindast av allari upphæddini. Við umsetning er at skilja samlað søla, tað eru inntøkur + útreiðslur.

> Les um skatt og heimavirki

Rindar man skatt av at selja húsini hjá sær?

Svar: Tað veldst um.

Keypti man húsini við vinningi fyri eyga, so rindar man skatt av vinninginum. Keypti man ikki húsini við vinningi fyri eyga, er vinningurin skattafríur. Eru minni enn tvey ár síðan keypið, skal seljari kunna prógva, at húsini ikki vórðu keypt við vinningi fyri eyga. Eru meira enn tvey ár síðan keypið, skal TAKS kunna prógva, at tey vórðu keypt við vinningi fyri eyga.

> Les um skatt av húsasølu og íbúðarsølu

Rindar man skatt av at selja kryptovaluta?

Svar: Ja.

Hevur man vinning av søluni, skal man rinda skatt av henni.

> Les um skatt og kryptovaluta

Rindar man skatt av at selja partabrøv?

Svar: Ja.

Vinningur av partabrøvum er skattskyldigur.

> Les um kapitalvinning

Kann eg fáa atgongd til skattaupplýsingarnar hjá makanum?

Svar: Ja.

Fyri at fáa atgongdina, skulu tú og makin standa skrásett sum hjún hjá Landsfólkayvirlitinum. Hetta síggja vit í skipan okkara. Standa tit tað, kom so inn á gólvið hjá okkum á Smyrilsvegi 20 og hav við tær samleikaprógv, tað er pass ella koyrikort. So avgreiða vit málið.

Brúkar makin Borgaragluggan, kanst tú eisini fáa atgongd til upplýsingarnar, við at makin gevur tær fulltrú at brúka sín Borgaraglugga.

> Les um fulltrú til Borgaragluggan

Eg lesi uttanlands. Hví gjaldi eg so nógvan skatt?

Svar: Tað kann vera tí, at tú hevur ikki søkt um at varðveita fulla skattskyldu í Føroyum.

Eg lesi uttanlands. Hví standi eg til at skylda skatt?

Svar: Tað kann somuleiðis vera tí, at tú hevur ikki søkt um at varðveita fulla skattskyldu í Føroyum.

> Les um at varðveita fulla skattskyldu í Føroyum

Hvar finni eg vegleiðingar til sjálvuppgávuna?

Svar: Vegleiðingar til sjálvuppgávuna kunnu heintast á evnissíðunum. Tær kunnu eisini heintast beint her niðanfyri.

Tvær vegleiðingar eru gjørdar í sambandi við sjálvuppgávuna. Vegleiðing at geva upp skatt og Vegleiðing at geva upp vinning og tap av partabrøvum.

Vegleiðing at geva upp skatt fevnir breitt og svarar alskyns spurningum um skatt og sjálvuppgávu. Vegleiðing at geva upp vinning og tap av partabrøvum vísir dømi um, hvussu kapitalvinningssjálvuppgávan skal útfyllast.

> Heinta vegleiðing at geva upp skatt (PDF)

> Heinta vegleiðing at geva upp vinning og tap av partabrøvum (PDF)