Skattauppgerð

Ein skattauppgerð er eitt yvirlit yvir upplýsingar, sum TAKS hevur um skattaviðurskifti tíni farna árið.  Tá ið árið er úti, sendir TAKS tær uppgerðina, vanliga fyrst í mars.

Skattauppgerðin vísir:

• hvussu stór tín skattskyldiga inntøka var farna árið
• hvønn frádrátt tú hevði
• hvussu nógvan skatt tú rindaði
• um skatturin passaði, ella um tú fært írestandi skatt ella avlopsskatt

Írestandi skattur og avlopsskattur

Írestandi skattur er skattur, sum tú sambært skattauppgerðini hevur goldið ov lítið farna árið. Írestandi skattur verður eisini kallaður restskattur. Tú rindar hann við rokning, sum TAKS sendir tær.

Avlopsskattur er skattur, sum tú sambært skattauppgerðini hevur goldið ov nógv farna árið. Avlopsskattur verður fluttur á lønarkontu tína mánadagin, 23. mars 2026.

Tú skalt kanna, um hon er røtt

Ein røtt skattauppgerð vísir alla inntøku og allan frádrátt hjá tær farna árið.

• Er uppgerðin røtt, skalt tú ikki gera meira, tí so rindar tú rættan skatt
• Er uppgerðin skeiv ella manglar okkurt, skalt tú geva TAKS rættar upplýsingar við at lata inn sjálvuppgávu

Tú hevur ábyrgdina av, at tín skattauppgerð er røtt

Uppgerðin hjá TAKS er bert ein meting út frá teimum upplýsingum, sum TAKS hevur atgongd til. TAKS hevur fingið hesar upplýsingarnar frá tær ella frá skattaskipanini.

Fært tú ikki  bræv við skattauppgerð, kann tað vera tí, at tú hevur leigað út, verið sjálvstøðugt vinnurekandi ella hevur havt uttanlandsinntøku ella útlendska eftirløn farna árið.

Tá fært tú í staðin bræv um at lata inn sjálvuppgávu.

• Les um sjálvuppgávu

Send okkum nýggja kontunummarið.

Við telduposti:

• Skriva nýggja kontunummarið á eitt skjal og skriva undir
• Skanna ella avmynda  skjalið og send til taks@taks.fo

Freistin er 15. mars 2026.

Á Borgaraglugganum:

• Rita inn á gluggan
• Vel Grundupplýsingar/fulltrúir > Kontaktupplýsingar > Broyt peningastovnskontu
• Fyll út og send

Freistin er 19. mars 2026.

Hygg í vegleiðingina at geva upp skatt

• Heinta vegleiðing

Spyr kundatænastu okkara

• Ring 35 26 00 ella kom inn á gólvið á Smyrilsvegi 20 í Havn. Avgreiðslutíðin er mánadag til hósdag millum 10 og 12.

Tú kanst eisini altíð

• skriva til taks@taks.fo,
• bíleggja eitt svar og fáa okkum at ringja teg upp aftur,
• spyrja Eyð Eið, kjattbottin hjá TAKS. Klikk á hana niðast til høgru á síðuni. Gev gætur, at svarini hjá Eyð Eið eru vegleiðandi. Spyr kundatænastuna, um tú ivast.