FAS – Føroysk altjóða skipaskrá

Skattareglurnar fyri FAS eru hesar:

• manning, sum hevur fulla skattskyldu í Føroyum, rindar 35% í skatti av hýruni
• manning, sum ikki hevur fulla skattskyldu í Føroyum, rindar eisini 35% í skatti av hýruni
• hýra á útlendskum skipi, sum verður leigað uttan manning av føroyskum reiðaríi, verður somuleiðis skattað við 35%
• harumframt verður goldið arbeiðsmarknaðargjald á 3% av skattskyldigu inntøkuni

Hevur tú FAS-inntøku, kann tað ávirka skattin av aðrari inntøku. Orsøkin er, at FAS-inntøkan verður roknað sum partur av samlaðu inntøkuni.

Hevur tú A-inntøku í Føroyum og FAS-inntøku sama ár, kann tað merkja, at tú skalt rinda restskatt, tá árið er liðugt. Ofta er tað tí, at FAS-inntøkan er hægri enn A-inntøkan og tí hevur størri ávirkan á skattagrundarlagið.

Reiðaríið brúkar eitt serligt v-tal, tá lønir verða fluttar. Hetta v-talið stýrir, hvussu nógv verður goldið í skatti.

Skal eitt skip koma undir FAS, skal tað vera 100 bruttoregistartons ella størri og hava føroyskan eigara.

Ofta er talan um handilsskip, men tað kunnu eisini vera ferðamannaskip og onnur vinnufør, til dømis prámar, lossingarbátar, dýpingarmaskinur, flótikranar og flótandi boripallar.

Fiskifør og stuttleikafør kunnu ikki koma undir FAS.

Síggj allar treytirnar í §§ 1-4 í FAS-lógini.

Vit vegleiða fegin

• Ring til kundatænastu okkara á 35 26 00 mánadag til hósdag millum 10 og 12 ella skriva til taks@taks.fo.

• Tú kanst eisini bíleggja eitt svar, og vit ringja teg upp aftur, tá tú hevur tíð.