Skriva út

Nær byrjar man at rinda skatt?

Man byrjar at rinda skatt, tá man tjenar meira enn 30.000 kr. um árið.

Fyrst kemur kommunuskatturin

Hann er ymiskur frá kommunu til kommunu, úr 16 upp í 21,75%.

Siga vit, at hann er 20%, so rinda vit 20 kr. í skatti fyri hvørjar 100, ið vit tjena yvir 30.000.

Síðan kemur landsskatturin

Hann byrjar, tá ið vit tjena meira enn 65.000 kr. um árið og veksur síðan, tess meira, vit tjena.

Man rindar eisini kirkjuskatt

Tað er, um man er limur í fólkakirkjuni.

Kirkjuskatturin er ymiskur frá kommunu til kommunu, millum 0,6 og 0,9%.

Almenn gjøld

Landsskatt, kommunuskatt og kirkjuskatt kalla vit undir einum fyri inntøkuskatt. Vanliga meinast við hetta, tá ið tosað verður um skatt.

Annar skattur er eisini, eitt nú eftirlønarskattur og kapitalvinningsskattur, men í mun til inntøkuskattin fer slíkur skattur ikki av lønini, og øll rinda hann ikki heldur.

Eitt, sum flestøll tó rinda umframt inntøkuskatt, eru almenn gjøld til heilsutrygd, barsilsskipan, arbeiðsmarknaðareftirløn o.a. Síggj tey við at velja "Almenn gjøld" undir snarslóðum.

Meira at vita um tín skatt?

Hygg undir snarslóðum her á síðuni.

Les til dømis, hvussu tín skattur verður roknaður, hvussu stórt skattaprosentið er í tínari kommunu, og hvussu nógvan kirkjuskatt, tú rindar, um tú ert limur í fólkakirkjuni.