Ert tú føddur í Føroyum, verður eitt vanligt p-tal tillutað tær, tá ið tú fært navn. Hetta tal verður brúkt, tá ið tú síðan fært løn.

Kemur tú til Føroyum at arbeiða í meira enn 180 dagar í eitt ár, fært tú eisini eitt vanligt p-tal. Tá verður tú nevniliga roknaður sum tilflytari og skalt flyta bústað higar. Tú fært p-talið útflýggjað, tá ið tú meldar adressuflytingina til bústaðarkommununa. Hevur tú einhvønn trupulleika við tí vanliga p-talinum, skalt tú somuleiðis venda tær til bústaðarkommununa.

Kemur tú til Føroya at arbeiða í 180 dagar ella minni í eitt ár, skalt tú hava eitt fyribils p-tal, eisini kallað eitt pseudo p-tal. Tað fært tú við at senda eina umsókn til TAKS. Tú kanst biðja arbeiðsgevara tín gera tað fyri teg. Finn umsóknina undir snarslóðum. Hon eitur "Umsókn um fyribils persónstal". Á blaðsíðu 2 á umsóknini er vegleiðing at útfylla hana.

Tá ið TAKS hevur fingið umsóknina, fært tú eitt fyribils p-tal og kanst fáa løn útgoldna. Minst til at senda umsóknina í góðari tíð, t.e. helst 14 dagar, innan lønin skal flytast.

Hevur tú fingið eitt fyribils p-tal eina ferð, verður tað verandi í skipanini, og tú skalt bert virkja tað aftur, um tú kemur til Føroya at arbeiða eina aðra ferð.

P-tal er stytting fyri persóntal og verður brúkt av myndugleikunum til at eyðmerkja hvønn einstakan borgara í m.a. skattaviðurskiftum.

Øll, sum eru fødd í Føroyum ella flyta higar, fáa eitt p-tal. Tað er Landsfólkayvirlitið, sum við heimild frá Innlendismálaráðnum stendur fyri skipanini.

P-talið er níggju tøl. Seks tey fyrstu eru føðingardagurin, trý tey seinastu eru persónlig tøl, sum bara borgarin kennir. Av hesum er síðsta talið ólíkatal hjá monnum og líkatal hjá kvinnum.

P-tøl í øðrum londum

Nógv lond brúka talskipanir til at eyðmerkja borgarar sínar í skattaviðurskiftum. Yvirskipað verður sagt TIN-nummar (TIN stendur fyri Tax Identification Number), men londini brúka ymisk heiti. Kennitala í Íslandi, Personnummer í Svøríki, CPR-nummer í Danmark, Fødselsnummer í Noregi o.s.fr.

Vel Tax Identification Numbers undir snarslóðum og síggj heitini, sum onnur lond nýta, og hvussu skipanirnar eru uppbygdar.