Skattauppgerð
Hevur tú fingið bræv við skattauppgerð fyri 2023 og vilt kunna teg um okkurt, so er hetta eitt gott stað.
Ein skattauppgerð er eitt yvirlit hjá TAKS yvir, hvat man hevði í inntøku og frádrátti síðsta ár, sum TAKS veit. Út frá tí roknar TAKS skattin hjá einum tað árið.
Fyrst í mars fáa nógv eina skattauppgerð sendandi frá TAKS
Tað, sum man skal gera við hana, er at vita, um hon er røtt
- Er hon røtt, skal man ikki gera meira, tí so er skatturin í lagi
- Er hon skeiv, ella manglar okkurt, skal man lata inn sjálvuppgávu
- Les um sjálvuppgávu
Vísir skattauppgerðin, at man fær avlopsskatt, t.e., at man eigur pengar til góðar hjá TAKS, verða pengarnir fluttir á kontu mikudagin, 27. mars. Vil man broyta kontunummarið, sum pengarnir verða fluttir á, kann tað gerast við maili og á Borgaraglugganum.
Síggj freistir og mannagongdir á taks.fo/vilt-tú-broyta-kontunummarið-til-avlopsskattin.
Uppgerðin, sum tú hevur fingið sendandi frá TAKS, er bara ein meting, sum TAKS hevur gjørt út frá teimum upplýsingum, sum stovnurin hevur atgongd til, antin gjøgnum skattaskipanina ella gjøgnum samskifti við teg.
Fær man ikki bræv um skattauppgerð, kann tað vera tí, at man leigar út, er sjálvstøðugt vinnurekandi, hevur uttanlandsinntøku ella útlendska eftirløn.
Tá fær man í staðin bræv um at lata inn sjálvuppgávu.
Vita Vegleiðing at geva upp skatt (PDF).
Spyr eisini kundatænastu okkara
Ring 35 26 00 mánadag til hósdag millum 10 og 15 ella skriva til taks@taks.fo.
