Skattur og Airbnb

Roknskaparleistur

• Heinta roknskaparleistin fyri húsaleigu undir leinkum her á síðuni.

• Skriva inntøkur og útreiðslur frá útleiguni í leistin.
• Goym leistin á telduni.

Innlating

• Rita inn á Borgaragluggan.
• Vel Sjálvuppgávan > Fyll út sjálvuppgávu > B-inntøkur.
• Upplýs inntøkuna í teigi 230.
• Viðheft roknskap og lat inn.

Frádráttur merkir, at tú kanst draga útreiðslur, sum hoyra til útleiguna, frá inntøkuni av henni. Tá verður skatturin roknaður av eini lægri upphædd og verður tí minni. Frádráttur skal avgreiðast yvir ein roknskap.

Í Airbnb kunnu rakstrarútreiðslur og viðlíkahaldsútreiðslur frádragast

• Rakstrarútreiðslur eru leypandi útreiðslur til at halda leigumál koyrandi, til dømis útreiðslur til streym, olju, reinhald, rentur, internet og tryggingar.
• Viðlíkahaldsútreiðslur eru útreiðslur til at halda, umvæla og útskifta veggir, búnýti, innleggingar og annað tílíkt, ið er fyri sliti og løsti í útleiguni.

Meira kann frádragast við fullari útleigu enn lutvísari útleigu:

• Full útleiga er útleiga av heilum húsum alt árið við inntøku alt árið.
• Lutvís útleiga er øll útleiga, sum ikki er full útleiga.

Frádráttur fyri rakstrarútreiðslur

• Full útleiga: frádrátturin er 100%.
• Lutvís útleiga: frádrátturin er eftir, hvussu stórur partur av húsunum er útleigaður, og hvussu stóran part av árinum. Eru 50 fermetrar útleigaðir av í alt 100, er frádrátturin 50%. Eru teir útleigaðir helvtina av árinum, er hann 25%.

Frádráttur fyri viðlíkahaldsútreiðslur

• Full útleiga: frádrátturin er 100% í mun til livitíðina á íløguni. Skal køkurin skiftast, skal gamli køkurin til dømis vera minst 25 ára gamal og hava verið partur av útleiguni øll árini fyri at fáa fullan frádrátt, ella skal frádrátturin minkast samsvarandi. Undir leinkjum er yvirlit yvir frádráttarmøguleikar og livitíðir í sambandi við húsaleigu.
• Lutvís útleiga: frádrátturin er eftir, hvussu stórur partur av húsunum er útleigaður, hvussu stóran part av árinum og eftir livitíðini á íløguni.

Frádráttarreglurnar eru ásettar í skattalógini

Tær standa í ávikavist § 31, stk. 1, og § 31, stk. 1, litra c.

Avskriving merkir eins og frádráttur, at tú kanst draga útreiðslur, ið hoyra til útleiguna, frá inntøkuni av henni, so at tú rindar minni í skatti. Munurin á hugtøkunum er, at har frádráttur skal avgreiðast yvir ein roknskap, kann avskriving avgreiðast yvir fleiri.

Í Airbnb kunnu stovningarútreiðslur avskrivast

Stovningarútreiðslur eru útreiðslur til at stovna nýtt leigumál, til dømis útreiðslur til leysafæ sum steintoy og seingjarklæði, og til fastafæ sum veggir og gólv.

Bert útreiðslur til leysafæ kunnu avskrivast.

Meira kann avskrivast við fullari útleigu enn lutvísari útleigu. Hugtøkini full og lutvís útleiga eru lýst omanfyri í partinum um frádrátt.

Avskrivingarreglur

• Full útleiga: leysafæ upp til 20.000 kr. kann avskrivast 100%.
  Leysafæ yvir 20.000 kr. kann avskrivast 30% um árið.

• Lutvís útleiga: leysafæ kann avskrivast árliga eftir, hvussu stórur partur av húsunum er útleigaður, og hvussu stóran part av árinum, roknað í mun til 30%. Eru 50 fermetrar útleigaðir av í alt 100, kunnu avskrivast 15%. Eru fermetrarnir útleigaðir helvtina av árinum, kunnu avskrivast 7,5%. 

Avskrivingarreglurnar eru ásettar í avskrivingarlógini

Reglurnar fyri fulla útleigu standa í kapitli 1, fyri lutvísa útleigu í kapitli 2.

Vita undir leinkjum her á síðuni

Tað kann vera, at svarið liggur har.

Vit vegleiða eisini fegin

• Ring til kundatænastu okkara á 35 26 00 mánadag til hósdag millum 10 og 12 ella skriva til taks@taks.fo.

• Tú kanst eisini bíleggja eitt svar, og vit ringja teg upp aftur, tá tú hevur tíð.