Lurta

Skattur og Airbnb

Skattur skal rindast av inntøku frá Airbnb. Tað gert tú við at fylla út roknskaparleistin hjá TAKS fyri húsaleigu og lata hann inn á Borgaraglugganum saman við sjálvuppgávuni.

Her finnur tú vegleiðing um roknskap, frádráttarmøguleikar og innlating.

Roknskapur og innlating

Roknskapur

  • Roknskapurin skal setast upp eftir roknskaparleistinum hjá TAKS fyri húsaleigu

  • Heinta roknskaparleistin undir leinkjum her á síðuni

  • Skriva inntøkur og útreiðslur frá útleiguni í leistin

  • Goym leistin á telduni

Innlating

  • Rita inn á Borgaragluggan
  • Vel Sjálvuppgávan > Fyll út sjálvuppgávu > B-inntøkur
  • Upplýs inntøkuna í teigi 230
  • Viðheft roknskaparleist og lat inn
Frádráttarmøguleikar

Frádráttur merkir, at tú kanst draga útreiðslur frá inntøkuni, áðrenn skattur verður roknaður. Meira kann dragast frá við fullari útleigu enn lutvísari.

  • Full útleiga: útleiga av heilum húsum alt árið við inntøku alt árið
  • Lutvís útleiga: øll útleiga, sum ikki er full útleiga

Frádráttur fæst fyri rakstrarútreiðslur, viðlíkahaldsútreiðslur og fyri leysafæ í sambandi við stovningarútreiðslur. Her lýsa vit útreiðslurnar í stuttum. Síggj eisini dømi og vegleiðingar undir leinkjum.

Rakstrarútreiðslur

Rakstrarútreiðslur eru leypandi útreiðslur til at halda leigumál koyrandi, til dømis:

  • streymur og olja

  • sápa og vesipappír
  • rentur og tryggingar
  • internet og airbnb-gjøld
  • vaskiløn og privat ruskkoyring

Frádráttur fyri rakstrarútreiðslur:

Full útleiga: frádrátturin er 100%

Lutvís útleiga: frádrátturin er eftir tali á útleigaðum fermetrum og leigudøgum. Eru 25 fermetrar útleigaðir av 100, er frádrátturin 25%. Eru fermetrarnir útleigaðir helvtina av árinum, er frádrátturin 12,5%.

Viðlíkahaldsútreiðslur

Viðlíkahaldsútreiðslur eru útreiðslur til slit og brek av nýtslu leigarans, til dømis:

  • útskifting av brotnum búnýti
  • máling av vindeygum og veggjum
  • umvæling av hita-, vatn- og elinnleggingum

Frádráttur fyri viðlíkahaldsútreiðslur:

Full útleiga: frádrátturin er 100%

Lutvís útleiga: frádrátturin er eftir tali á útleigaðum fermetrum og leigudøgum. Sí útrokningardømi undir rakstrarútreiðslum.

Gev gætur, at viðlíkahaldsútreiðslur kunnu ikki dragast fult frá, fyrr enn ávíst áramál er farið. Ein kaffimaskina skal vera trý ár. Verður hon útskift áðrenn, minkar frádrátturin samsvarandi. Undir leinkjum kanst tú heinta yvirlit yvir áramál fyri, nær fullur frádráttur fæst fyri ymiskar viðlíkahaldsútreiðslur.

Stovningarútreiðslur

Stovningarútreiðslur eru útreiðslur til at stovna nýtt leigumál, til dømis:

  • fastafæ sum veggir, vindeygu og gólv
  • leysafæ sum steintoy, innbúgv og seingjarklæði

Frádráttur fyri stovningarútreiðslur:

Fyri fastafæ er eingin frádráttur, hann verður bert givin fyri leysafæ.

Fyri leysafæ við fullari útleigu: frádrátturin er 100%.
Fyri leysafæ við lutvísari útleigu: frádrátturin er 30% alt eftir tali á útleigaðum fermetrum og leigudøgum. Sí útrokningardømi undir rakstrarútreiðslum.

*) Gev gætur, at eitt leysafæ kann ikki dragast frá, um tað kostar meira enn 20.000 kr. Tá kann tað í staðin avskrivast við 30% um árið.

Fá yvirlit frádráttarmøguleikarnar

Heinta talvu yvir frádráttarmøguleikar í sambandi við húsaleigu undir leinkjum.

Spurningar?

Vit vegleiða fegin

  • Ring til kundatænastu okkara á 35 26 00 mánadag til hósdag millum 10 og 12 ella skriva til taks@taks.fo

  • Tú kanst eisini bíleggja eitt svar, og vit ringja teg upp aftur, tá tú hevur tíð