Húsaleiga skal gevast upp við roknskapi, um tú leigar út til fyritøku. Hvat fyritøkan brúkar leigumálið til, hevur ikki týdning.

Húsaleiga skal eisini gevast upp við roknskapi, um tú leigar út til privatfólk í styttri tíðarskeið. Tað er at rokna sum styttri tíðarskeið, um leigað verður út í styttri enn tríggjar mánaðir. Tað er eisini at rokna sum styttri tíðarskeið, um leigarin ikki býr fast á staðnum. Hann brúkar tað til dømis sum feriubústað ella fyribilsbústað eina tíð, samstundis sum hann hevur aðra adressu. Sum dømi kann nevnast Airbnb og aðrar tílíkar tænastur, sum leigað verður ígjøgnum.

Húsaleiga við roknskapi verður skattað sum vanlig inntøka og kann ávirka skattaprosentið á inntøku tíni annars. Húsaleigan skal setast upp eftir roknskaparleistinum hjá TAKS fyri húsaleigu og skal latast inn á Borgaraglugganum saman við sjálvuppgávuni. Les meira um hetta undir partinum "Soleiðis gevur tú húsaleigu upp í praksis".

Tá ið partur av húsum verður útleigaður

Í døminum omanfyri verða heil hús útleigað. Verður nú bert ein partur av húsunum útleigaður, skal hetta takast við í roknistykkið. Eru húsini 200 fermetrar, og 50 fermetrar verða leigaðir út 150 dagar um árið, so skulu útreiðslurnar fyrst lækkast í mun til fermetrarnar, t.e. 50/200, og síðan í mun til dagatalið, t.e. 150/365. Inntøkan verður tald saman, og síðan verða útreiðslur drignar frá í tann mun, tær eru knýttar at inntøkuni. Tað merkir, at verða eini hús útleigað 150 dagar um árið, so ber til at draga frá 150/365 partar av útreiðslunum til el, olju, trygging og tílíkt.

Viðlíkahaldsútreiðslur kunnu dragast frá, áðrenn skatturin verður roknaður

Talan er um útreiðslur til slit og brek, sum leigarin ger á leigumálið. Tá ið so er, verður mett um livitíðina á vøruni, og viðlíkahaldsútreiðslurnar kunnu so dragast frá í mun til livitíðina. Livitíðin hjá eini vaskimaskinu er t.d. mett til 15 ár. Verður hon umvæld fyri slit, kanst tú draga 1/15 av viðlíkahaldsútreiðslunum frá fyri hvørt ár, sum vaskimaskinan hevur verið partur av tí útleigaða. Útreiðslur at klárgera hús ella íbúð til útleigingar kunnu ikki dragast frá sum viðlíkahaldsútreiðslur. Hetta er tí, at talan er stovningarútreiðslur.

Undir snarslóðum finnur tú skjal um frádráttarmøguleikar og livitíð fyri aðrar vørur í sambandi við húsaleigu.

Avskrivingar

Í summum førum kann innbrúgv avskrivast sambært avskrivingarlógini. Verða hús útleigað burturav, kunnu avskrivingar gerast eftir 1. kapitli í avskrivingarlógini. Bert innbúgv kann tá avskrivast, ikki húsini. Í øðrum førum kann avskrivast eftir 2. kapitli í avskrivingarlógini. Tá verður avskrivað í mun til dagatal, sum útleigað verður.

Bruttoskatt brúkar tú bara, um tú leigar út beinleiðis til privatfólk í minst tríggjar mánaðir. Leigarin skal eisini búgva fast á staðnum.

Velur tú bruttoskatt, fært tú ein árligan skattafrían frádrátt av leiguinntøkuni og rindar 25% í skatti av restini. Er árliga leiguinntøkan minni enn frádrátturin, er eingin skattur. Avgerðin um at geva húsaleiguna upp sum bruttoskatt er bindandi í trý fylgjandi inntøkuár. Tað merkir, at tú ikki kanst skifta yvir til at geva húsaleiguna upp sum roknskap innan fyri í hesi trý árini.

Húsaleiga sum bruttoskattur skal gevast upp saman við sjálvuppgávuni á Borgaraglugganum ella manuelt. Les meira um hetta undir partinum "Soleiðis gevur tú húsaleigu upp í praksis".

Tá ið fleiri eiga eini hús

Leiga fleiri persónar út eini hús, býta teir skattafríu upphæddina ímillum sín eftir ognarluti. Eiga til dømis Hanus og Jógvan helvt um helvt av einum útleigaðum húsum í 2020, er skattafría upphæddin hjá hvørjum teirra 50.000 kr. Eigur Hanus tríggjar fjórðingar og Jógvan ein fjórðing av húsunum, broytist skattafría upphæddin samsvarandi. Hanus fær 75.000 kr. og Jógvan 25.000 kr. Tað broytir einki, um annar gevur upp við roknskapi og hin sum bruttoskatt. Skattafría upphæddin hjá tí, sum gevur upp sum bruttoskatt, verður altíð ásett eftir hansara ognarluti.

Tá ið ein eigur fleiri hús

Leigar ein persónur út fleiri hús, er skattafría upphæddin framvegis kr. 100.000 í alt í 2021. Gevur hann tá upp sum bruttoskatt, skal hann nýta bruttoháttin fyri samlaðu leiguinntøkurnar frá øllum leigumálunum til bústaðarendamál.

Við roknskapi

Húsaleiga við roknskapi skal setast upp eftir roknskaparleistinum hjá TAKS fyri húsaleigu og skal latast inn á Borgaraglugganum saman við sjálvuppgávuni. Til ber ikki at lata inn á annan hátt.

Rita inn á Borgaragluggan og vel teigarnar 230 ella 330, alt eftir um leigan hevur givið inntøku ella hall. Tú finnur teigarnar undir Sjálvuppgávan 2022 > Sjálvuppgáva > Fyll út sjálvuppgávu > B-inntøkur. Roknskaparleisturin kemur fram av sær sjálvum.

Tú kanst eisini heinta roknskaparleistin her undir snarslóðum. Fyll út og viðheft hann á Borgaraglugganum.

Sum bruttoskattur

Húsaleiga sum bruttoskattur skal gevast upp saman við sjálvuppgávuni, antin á Borgaraglugganum ella manuelt.

Á Borgaraglugganum ritar tú inn, velur Sjálvuppgávan 2022 > Húsaleiga og fyllir út.

Manuelt fyllir tú út teigin “Bruttoinntøka av húsaleigu” á síðu 1 á sjálvuppgávuni og sendir við vanligum brævi til TAKS, Postboks 2151, 110 Tórshavn ella við teldubrævi til taks@taks.fo. Tú kanst heinta sjálvuppgávuna her á síðuni undir snarslóðum.

Brúkar tú ikki Borgaragluggan?

Vel "Um Borgaragluggan" undir snarslóðum og les um fyrimunirnar við tænastuni, og hvussu tú fært atgongd.

Les til dømis "Rundskriv um útleigan av húsum og íbúðum" og niðast síðu 107-108 í "VLS 2015". Tú finnur skjølini undir snarslóðum her á síðuni.

Tú kanst eisini spyrja kundatænastu okkara

Ring 35 26 00 mánadag til hósdag millum 10 og 15 ella skriva til taks@taks.fo. Vit vegleiða fegin.