Fyri at fáa barsilspening, skalt tú:

• hava fastan bústað í Føroyum,
• hava fulla skattskyldu í Føroyum,
• vera um barnið í farloyvistíðini,
• hava havt a-inntøku seinastu 12 mánaðirnar, áðrenn farloyvið byrjar.

Ert tú sjálvstøðugt vinnurekandi (t.e. hevur einstaklingsvirki ella íognarfeløg), løntakari við b-inntøku ella norðurlendskur løntakari í FAS, so skalt tú tekna eina barsilstrygging fyri at fáa útgjald. Tryggingargjaldið er 3.000 kr. um árið, og tryggingin skal hava verið í gildi samanhangandi í eitt ár, áðrenn tú fært útgjald. Kemur tryggingin ikki í gildi við ársbyrjan, skal fyrstu ferð rindast eitt lutfalsligt gjald av árliga gjaldinum. Lutfalsliga gjaldið er 3.000 kr. býtt við øllum døgum í árinum faldað við so nógvum døgum í árinum, sum tryggingin er galdandi.

Les meira um hetta á heimasíðuni hjá Barsilskipanini undir snarslóðum. Har finnur tú eisini oyðubløð til at tekna tína barsilstrygging.

Ert tú arbeiðsgevari?

Vel Barsilsskipanin (arbeiðsgevari) undir snarslóðum og les meira um um tíni barsilsviðurskifti.

Mamman hevur rætt til barsilspening, frá tí at 4 vikur eru eftir til metta føðing, ella upp í 8 vikur áðrenn, um lækni mælir til tað. Eftir føðing fæst barsilspeningur í 52  vikur. Hesa tíðina eigur mamman 14 og pápin ella sammóðirin 4 vikur, og síðan kunnu foreldrini býta 34 vikur sínámillum.

Vikurnar, sum eru til býtis, kunnu ikki nýtast fyrr enn 14 vikur eftir barnsburð. Til ber ikki at vera í barnsburðarfarloyvi í styttri enn 7 samanhangandi dagar í senn.

Barn, føtt áðrenn viku 32

Verður barnið føtt áðrenn viku 32, hækka vikurnar hjá foreldrunum við 8. Samlaða barnsburðarfarloyvið er tá 60 vikur.

Fleirburar

Er talan um fleirburar, hækka vikurnar hjá foreldrunum við 4. Samlaða barnsburðarfarloyvið er tá 56 vikur.

Ættleiðing

Foreldur, ið ættleiða barn, hava rætt til barsilspening í til samans 52 vikur eftir móttøku av barninum. Harafturat hava tey bæði rætt til barsilspening í upp til 4 vikur áðrenn móttøku av barni. Treytin er, at tey eru uttanlands eftir barninum hetta tíðarskeið.

Singul?

So hevur tú rætt til vikurnar hjá hinum foreldrinum afturat.

Um barn doyr

Barsilsfarloyvi
Doyr barn í móðurlívi hevur tú rætt til barsilsfarloyvi, um lækni váttar, at talan er um barnsburð. Doyr barnið eftir føðing, hevur tú rætt til barsilsfarloyvi.

Vikurnar eftir 14. viku kunnu tó bert nýtast av tær. Doyr barnið í hesum vikum, heldur barsilstíðin hjá pápanum ella sammóðurini uppat, um tey tá frammanundan hava brúkt sínar fýra vikur.

Verður ikki váttað, at talan er um barnsburð, hevur tú ikki rætt til barsilsfarloyvi.

Barsilspeningur
Doyr barn í móðurlívi ella í barsilstíðini er týdningarmikið at fráboða barsilsskipanini hetta beinanvegin, so tú ikki kemur í eftirstøðu við at fáa ov nógvan barsilspening útgoldnan.

Doyr barnið í móðurlívi eftir 22. viku ella í barsilstíðini skalt tú seta teg í samband við Almannaverkið um møguligt endurgjald fyri mista arbeiðsinntøku sambært Løgtingslóg um almannatrygd og tænastur, §25, stk. 5.

Støddin á útgjaldinum er ymisk, alt eftir hvat fyri arbeiði, ein hevur, og um ein er arbeiðsgevari. Barsilspeningurin fer tó ongantíð upp um 25.000 kr. um mánaðin.

Barsilspeningurin verður goldin eina ferð um mánaðin afturút og er vanliga á kontu fjórða gerandisdag í hvørjum mánaði. Frítíðarløn og eftirløn fara burturav eins og av vanligu lønini.

Eftir 1. mars 2018 verður eftirlønin løgd afturat.

Fyri at søkja um barsilspening skalt tú senda Barsilsskipanini eina umsókn. Oyðubløð og adressu finnur tú á heimasíðuni hjá Barsilsskipanini. Hana finnur tú undir snarslóðum.

Umsóknin skal vera inni í seinasta lagi 1 ár eftir barnsburð/ættleiðing.