Ferðastuðul

Fyri at fáa stuðul skalt tú:

• hava lønarinntøku
• hava útreiðslur av ferðingini
• hava bústað og fulla skattskyldu í Føroyum
• hava minst 30 km til og frá arbeiði í alt pr. dag

Tú kanst fáa ferðastuðul fyri 220 arbeiðsdagar um árið.

Dupult húsarhald

• Hevur tú dupult húsarhald, kanst tú søkja um stuðul til ferðing millum leigubústað og arbeiðspláss.

Fleiri arbeiðsgevarar

• Hevur tú fleiri arbeiðsgevarar á einum staði og fert heim ímillum, kanst tú søkja um stuðul til tvær ferðir aftur og fram pr. dag.
• Hevur tú fleiri arbeiðsgevarar á ymiskum støðum, kanst tú søkja um stuðul til eina ferð aftur og fram til hvørt stað pr. dag

Lærlingar og lesandi

• Lærlingar hava rætt til ferðastuðul, eisini tá teir eru í skúla. Tá skal saman við umsóknini leggjast váttan frá skúlanum um, at ein hevur verið til undirvísing.
• Lesandi hava ikki rætt til ferðastuðul. Tey kunnu í staðin søkja um skúlakort frá Strandfaraskipum Landsins.

Ferðastuðulin verður roknaður eftir, um tú ferðast landvegis ella sjóvegis, og um tú brúkar undirsjóvartunlar. Landvegis verður roknað eftir kilometrum, og sjóvegis eftir tali á túrum. Stuðul fæst ikki fyri ferðing loftvegis.

Landvegis ferðing

Stuðul út frá kilometrum í alt pr. dag:

• 30,0 – 49,9 km: 13,50 kr.
• 50,0 – 63,9 km: 20,50 kr.
• 64,0 – 101,9 km: 27,00 kr.
• 102,0 – 123,9 km: 32,50 kr.
• 124,0 – 145,9 km: 38,00 kr.
• 146,0 – 167,9 km: 43,50 kr.
• 168,0 – 189,9 km: 49,00 kr.
• 190,0 – 211,9 km: 54,50 kr.
• 212,0 km og meir: 60,00 kr.

Sjóvegis ferðing

Stuðul pr. túr:

• Suðuroyarleið: 15,90 kr.
• Aðrar sjóleiðir: 7,45 kr.
• Vágatunnil: 7,45 kr.
• Norðoyatunnil: 7,45 kr.
• Sandoyartunnil: 8,45 kr.
• Eysturoyartunnil: 8,45 kr.

Søkjast kann um stuðul fyri í mesta lagi tveir túrar sjóvegis pr. dag.

Eysturoyartunnilin og Brúgvin um Streymin

Kanst tú velja ímillum Eysturoyartunnilin og Brúnna um Streymin til og frá arbeiði, skalt tú søkja fyri ta leið, tú brúkar.

Brúkar tú báðar leiðirnar, skal hvør leið gerast upp fyri seg. Koyrir tú til dømis 200 dagar, helvt um helvt brúgv og tunnil, skalt tú søkja um 100 dagar fyri hvørja leið.

Umsókn

Umsókn um ferðastuðul skal latast inn talgilt á ferdastudul.taks.fo.

Tú søkir fyri undanfarna árið og fyri alt árið í senn.

Tað kunnu ganga nakrar vikur, frá tí at umsóknin er innlatin, til stuðulin er á kontu.

Freist

Freistin at søkja um ferðastuðul er 31. desember árið eftir tað árið, tú søkir fyri.

Vit vegleiða fegin

• Ring til kundatænastu okkara á 35 26 00 mánadag til hósdag millum 10 og 12 ella skriva til taks@taks.fo.

• Tú kanst eisini bíleggja eitt svar, og vit ringja teg upp aftur, tá tú hevur tíð.