Frítíðin er 30 dagar, um arbeitt hevur verið fulla tíð í innvinningarárinum. Er arbeitt minni, verða tíð og løn tillagaðar samsvarandi.

Innvinningarárið er tíðin, tá ið frítíðarlønin verður upptjent

Vanliga er tað frá 1. apríl til 31. mars. Hjá Felagnum føroyskir sjúkrarøktarfrøðingar er innvinningarárið tó frá 1. januar til 31. desember.

Tímalønt

Frítíðarlønin hjá tímaløntum er 12% av tí, sum tey hava tjent í innvinningarárinum. Arbeiðsgevarin rindar henda prosentpart á frítíðarkontu hjá TAKS, samstundis sum hann flytur vanligu lønina.

Mánaðarlønt

Hjá mánaðarløntum er frítíðarlønin ein vanlig mánaðarløn + eitt frítíðarískoyti á 1,5% av teirri løn, sum tey hava tjent í innvinningarárinum.

Arbeiðsgevarar umsita og útgjalda sjálvir frítíðarískoytið. Vanliga verður tað útgoldið saman við lønini í apríl.

Frítíðin skal vera hildin í seinasta lagi 1. mai árið eftir innvinningarárið.

Innvinningarárið er tíðin, tá ið frítíðarlønin varð upptjent. Var tað til dømis frá 1. apríl í fjør til 31. mars í ár, so skal frítíðin vera hildin ímillum 2. mai í ár og 1. mai næsta ár.

Er hon tá ikki hildin, dettur hon burtur.

Tímalønt

Frítíðarlønin verður útgoldin 2. mai. Til ber ikki at fáa frítíðarlønina útgoldna áðrenn.

Frítíðarlønin verður útgoldin á ta kontu, sum tú hevur skrásett í Borgaraglugganum. Niðast á síðuni kanst tú lesa meira um at skráseta og broyta kontunummarið til frítíðarlønina.

Mánaðarlønt

Hjá mánaðarløntum verður frítíðarlønin útgoldin sum vanlig løn á somu kontu, sum lønin verður flutt á. Sama er við frítíðarískoytinum. Tað verður vanliga útgoldið saman við lønini í apríl.

Hevur tú sum løntakari onga kontu í føroyskum peningastovni, verður ein slippur sendur tær. Ein slippur er at líkna við ein kekk.

Ímillum 1. mai og 15. juni kann slippurin sendast TAKS við upplýsingum um, á hvørja kontu, frítíðarlønin skal flytast á. Ella tú vendir tær til Betri Banka og fært peningin útgoldnan. Býrt tú uttanlands, kanst tú undirskriva slippin og senda hann aftur til TAKS við upplýsingum um kontunummarið, haðar peningurin skal flytast. Er kontan útlendsk, rindar tú fyri flytingina.

Eftir 15. juni kanst tú senda okkum eitt teldubræv til taks@taks.fo og biðja um at fáa frítíðarlønina flutta á kontu. Tá er ikki neyðugt at viðhefta slippin. Er slippurin burturblivin, ber til at fáa frítíðarlønina setta á kontu við at venda sær til TAKS. Tá verður hon tó ikki útgoldin fyrr enn eftir 16. juni.

Tað ger TAKS sambært § 20 a, stk. 2, í frítíðarlógini.

Tað gert tú á Borgaraglugganum ella við oyðublaði.

Á Borgaraglugganum

Undir Grundupplýsingar/fulltrúir > Kontaktupplýsingar > Peningastovnskontur > Konta til frítíðarløn: Klikk á "Broyt peningastovnskontu" og broyt. Hesa funku nýtir tú eisini, tá ið tú skrásetir kontunummarið til frítíðarlønina fyrstu ferð.

Við oyðublaði

Fyll út oyðublaðið "Broyting ella skráseting av kontunummari" og send okkum tað. Tú finnur tað undir oyðubløðum her á síðuni. Minst til, at tú í oyðublaðnum setir kross í "Frítíðarløn".

Broytingarfreist

Á Borgaraglugganum er broytingarfreistin umleið 14 dagar áðrenn útgjaldsdagin, við oyðublaði vanliga ein mánað áðrenn.

Neyva freistin verður ásett, tá ið tíðin nærkast.

Flytur tú uttanlands?

Tá er best at bíða við at siga upp peningastovnskontuna, til frítíðarlønin er útgoldin, 2. mai.