Garantisendingar

Vøra, sum verður innflutt sum umbýtisvøra, og vøra, ið verður innflutt undir garantii, kann innflytast toll- og avgjaldsfrítt í garantitíðini. Sama er galdandi fyri umbýtislutir, eykalutir og umvælingar av vørum, sum eru undir garantii.

Vøra, sum kemur til landið toll- og avgjaldsfrítt sum ferðagóðs, men sum síðan verður aftursend til seljara uttanlands til umbýtingar ella tílíkt, skal gjalda toll- og avgjøld, tá ið hon kemur aftur til Føroya. Hetta, hóast hon upprunaliga varð innflutt toll- og avgjaldsfrítt.

Fyri at fáa toll- og avgjaldsfrítøku, skal tað standa týðiliga á fakturanum ella proforma-fakturanum frá seljaranum, at talan er um umbýtisvøru undir garanti ella um eina garantiumvæling.

Skal keyparin rinda fyri vøruna ella umvælingina og fær faktura upp á tað, kann vøran ikki flytast inn toll- og avgjaldsfrítt. Hon skal tá í staðin tollavgreiðast eftir avgjaldsskyldiga virðinum, sum verður ásett út frá vanliga søluprísinum á vøruni ella vanliga kostnaðinum fyri umvælingina.

TAKS kann krevja skjalprógv fyri, at vøran er undir garanti, t.d. keypssáttmála. TAKS kann eisini krevja upprunafaktura fyri vøruna.