Tollfrítt fyri ferðandi til Føroya

Boðar man ikki frá og verður steðgaður, skal man rinda tollin – og harumframt eina bót, sum er tað dupulta av tollupphæddini.

Les meira um fráboðan í partinum "Grøna og reyða tollrásin" niðari á síðuni.

Man skal kunna prógva prísin á vøruni

Tað ger man til dømis við at vísa eina kvittan. Hevur man ikki prógv fyri prísinum, hevur tolleftirlitið heimild til sjálvt at áseta hann.

Vøra, sum hoyrir saman, skal vera saman

Man kann ikki koyra eina vøru í partar og flyta teir inn, ein part í senn. Ella deila partarnar ímillum fleiri persónar, sum so flyta allar inn í senn. Hetta hóast virðið á hvørjum parti sær er lægri enn 2.500 kr. Einir oyraringar, sum kosta 3.500 krónur, kunnu ikki flytast inn tollfrítt ein og ein fyri 1.750 krónur.

Keypast kunnu hesar vørur og hesar mongdir:

Góðgæti

• Sjokulátu- og sukurvøra, 3 kg
• Sodavatn, 10 litrar

Luktilsi

• Luktilsi, 50 gr
• Rakivatn, 25 cl

Tubbak

• 200 sigarettir
• ella 100 sigarillos
• ella 50 sigarir
• ella 250 gr. av balli ella snúsi

Rúsdrekka

• 1 litur av brennivíni upp til 60%* + 1 litur av heitvíni o.ø. upp til 22%* + 2 litrar av øli ella 2 litrar av cider upp til 5,8%*
• ella 1 litur av brennivíni upp til 60% + 2,25 litrar av borðvíni + 2 litrar av øli ella 2 litrar av cider upp til 5,8%*
• ella 2,25 litrar av heitvíni o.ø. upp til 22%* + 2 litrar av øli ella 2 litrar av cider upp til 5,8%*
• ella 4,5 litrar av borðvíni + 2 litrar av øli ella 2 litrar av cider upp til 5,8%*
• ella 10 litrar av øli ella 10 litrar av cider upp til 5,8%*

*) % vol.alk

Til ber at keypa tollfrítt sum ferðandi einaferð um samdøgrið. Gev gætur, at 18 ára aldursmark er fyri at keypa tubbak og rúsdrekka.

Hetta kann keypast afturat við at rinda avgjald

Sum ferðandi kann man samanlagt, tað er við tí tollfría og tí, sum fæst afturat við at rinda avgjald, í mesta lagi keypa hesa nøgd av rúsdrekka:

• 3 litrar av brennivíni millum 22 og 60%,
• 9 litrar av víni ella øðrum rúsdrekka upp til 22% og
• 10 litrar av øli ella cider.

Tað, sum fer upp um hetta, verður tikið av tolleftirlitinum.

Tá man kemur til Føroya sum ferðandi, skal man velja ímillum at fara ígjøgnum ta grønu ella reyðu tollrásina.

Vel grønt, um tú einki hevur at tolla

Grønt merkir, at tú:

• ikki hevur keypt vøru fyri meira enn 2.500 kr. í alt (uttan mvg) og
• ikki hevur keypt nakað eyka av tollfríum.

Tað at velja grønu rásina er tað sama sum at boða frá, at man einki hevur at tolla. Verður man tá kannaður og hevur okkurt at tolla, fær man bót.

Vel reytt, um tú hevur okkurt at tolla ella ivast

Reytt merkir, at tú:

• hevur keypt vøru fyri meira enn 2.500 kr. í alt (uttan mvg) og/ella
• hevur keypt okkurt eyka av tollfríum.

Tú eigur eisini at velja reyðu rásina, um  tú ivast, hvat rætt er at gera, ella um tú vilt spyrja tolleftirlitið um okkurt. Tað kostar einki.

Tollplakatin gevur yvirlit yvir alt tað tollfría. Heinta hana her niðanfyri ella undir leinkjum. Vel PDF, um plakatin skal skrivast út. Prentið verður klárari.

Heinta tollplakat á føroyskum

> Tollplakat_FO (PDF)
> Tollplakat_FO (JPEG)

Heinta tollplakat á enskum

> Tollplakat_EN (PDF)
> Tollplakat_EN (JPEG)

Vita TAKS á Facebook, spurningar og svar um at keypa tollfrítt. Kanska onkur hevur ivast í tí sama sum tú. Kunngerðin um tollfría sølu upplýsir eisini væl um ymisk viðurskifti. 

Vit vegleiða eisini fegin

Ring til kundatænastu okkara á 35 26 00 mánadag til hósdag millum 10 og 15 ella send eitt teldubræv til taks@taks.fo.