Kunning til gistingarveitarar um burðardygdargjald
Løgtingið hevur við broyting í ferðavinnulógini samtykt, at frá 1. februar 2026 skulu gistingarveitarar krevja inn burðardygdargjald frá ferðafólki, sum rindar fyri gisting. Broytingin er lýst í Kunngerðablaðnum A, nr. 196, tann 9. desember 2025.
Gjaldið skal krevjast frá ferðafólki 16 ár og eldri og er 20 krónur fyri náttina, tó í mesta 200 krónur fyri hvønn persón.
Sum gistingarveitarar telja:
- gistingarhús
- kampingpláss
- tjaldingarpláss
- privatfólk, sum leiga út sjálv ella gjøgnum gistingarportalar
- havnarmyndugleikar, sum taka gjald fyri atløgupláss hjá vitjandi stuttleikabátum
Burðardygdargjaldið skal avroknast við TAKS frá og við 2027. TAKS fer at koma við meiri kunning um hetta seinni.