Lurta

At rokna og flyta starvsfólki eftirløn

Tá ið arbeiðsgevarar flyta fólki løn, skulu teir samstundis flyta teimum eftirløn. Gjaldið skal rindast saman við lønini gjøgnum vanligu skattaskipanina hjá TAKS. Upphæddin er sambært setanarsáttmálanum, sum hvør einstakur hevur.

Eftirløn skal roknast av øllum lønarflytingum

Hon skal ikki bara roknast av vanligu mánaðarlønini, uttan eisini av frítíðarløn, nevndarsamsýningum, eykastørvum, yvirtíðararbeiði o.s.fr.

Dømi: Eitt starvsfólk fær 30.000 kr. í mánaðarløn og 12% í frítíðarløn, í alt 33.600 kr. Eftirlønin, sum eisini er 12%, skal roknast av samlaðu upphæddini, og eftirlønargjaldið henda mánaðin verður tí 33.600 x 0,12 = 4.032 kr.

Kravið um eftirløn er so strangt, at verður eftirløn ikki flutt, kann lønin heldur ikki flytast.

Eftirløn skal tó ikki roknast av hesum útgjøldum:

  • vinningur av eydnuspæli, legati, sømdargávu og líknandi,
  • útgjald úr arbeiðsmarknaðareftirlønargrunninum,
  • uppihaldspeningur sambært hjúnabandslóggávuni,
  • útgjald í sambandi við ættleiðingarstuðul,
  • útgjald í sambandi við útbúgvingarstuðul,
  • útgjald av tryggingarupphædd og líknandi,
  • útgjald í sambandi við tænastumannaeftirløn,
  • útgjald í sambandi við lívrentu og líknandi,
  • útgjald í sambandi við lutaeftirløn,
  • útgjald í sambandi við lógina um arbeiðsfremjandi tiltøk,
  • útgjald í sambandi við viðbót til ávísar pensjonistar,
  • útgjald í sambandi við barnagjald til einsamallar uppihaldarar,
  • útgjald í sambandi við almannapensjónir,
  • útgjald í sambandi við forsorgarlógini,
  • útgjald í sambandi við stuðul til uppihaldspening,
  • útgjald í sambandi við barnavernd.
Eftirløn skal flytast øllum starvsfólkum við hesum undantøkum
  • Starvsfólkum, ið eru fødd áðrenn 1. januar 1954, tí at heldur ikki hesum er álagt at spara saman til eftirløn.
  • Starvsfólkum, sum fáa tænastumannaeftirløn.
  • Starvsfólkum, sum tann 1. januar 2014 høvdu eftirlønarskipan frá donskum eftirlønarveitara og framvegis hava somu skipan.
  • Starvsfólkum, ið flyta til Føroya í tíðaravmarkað starv, og ikki hava fulla skattskyldu í Føroyum, meðan tey eru her.
Vegleiðing um at flyta eftirlønina

Vegleiðing um, hvussu tú flytur eftirlønina sum arbeiðsgevari, fæst við at venda sær til Elektron ella til peningastovnarnar.

Um eftirløn ikki verður goldin rættstundis

Rindar tú sum arbeiðsgevari ikki eftirlønina rættstundis, verður skattur av eftirlønini heldur ikki goldin rættstundis. Í slíkum føri verða 4% løgd oman á skattin í rentu, og TAKS heintar inn samlaðu upphæddina frá tær sum arbeiðsgevara.