Vinnulig innheinting er tað at krevja inn skuld hjá vinnurekandi feløgum. Er tað skuld til landið, eitt nú skattur, mvg ella tollur, er TAKS innheintingarmyndugleiki.
Innheintingin hevur fimm stig: áminning, fráboðan, komuboð, panting og trotabúsviðgerð.
Rindar vinnurekandi felag ikki skuld innan ásetta freist, fær tað eitt áminningarskriv frá TAKS um skuldina. Um eftirstøðuna, sum vit siga. Brævið kunnar um upphædd og gjaldsfreist, og rindar felagið, áðrenn freistin er farin, verður ikki meira gjørt við málið.
Verður ikki rindað, ella felagið ikki vart við seg, fer málið til innheintingardeildina hjá TAKS.
Verður framvegis ikki rindað innan rímiliga tíð, ringir innheintingardeildin til felagið fyri at fáa skuldina avgreidda.
Stundum kann tað gerast við einum skaðaleysum transporti. Tað er eitt skjal, har felagið við undirskrift frá ábyrgdarpersóni í felagnum sjálvboðið biður triðjapart, sum tað eigur okkurt til góðar hjá, um at flyta TAKS ágóðan, lutvísan ella allan. Røkkur ikki til alt, svarar felagið framvegis fyri tí, sum eftir er
Greiðir hetta málið, endar tað her.
Verður skaðaleysur transportur ikki nýttur, og felagið ikki rindar eftirstøðuna innan rímiliga tíð, sendir innheintingardeildin felagnum eini komuboð. Tess størri skuld, tess skjótari koma boðini. Onkuntíð koma tey beinanveg.
Komuboð eru eitt bræv, har felagið verður biðið um at koma til fundar hjá TAKS ein ávísan dag fyri at finna eina afturgjaldingarloysn. Brævið kunnar eisini um, at fæst ein afturgjaldingarloysn á fundinum, endar málið har, og at fæst hon ikki, verður farið til pantingar.
Tað er møtiskylda til fundin.
At panta er at taka trygd í ogn hjá felagnum – at lýsa/taka pant í, sum vit siga. Tað kann vera fastogn sum leysafæ, og ognin kann tá ikki seljast ella avhendast uttan góðkenning frá TAKS.
Er eingin ogn, ella er hon einki verd, kann talan gerast um úrslitaleysa panting. Hon kann eins og panting bróta fyrningarfreistina og leingja hana. so at hon verður fimm ár frá pantingardegnum. Nýggj úrslitaleys panting leingir í onnur fimm ár.
Stundum kann verða pantað á adressu felagsins. Tað er, tá felagið ikki møtir til komuboð, ella nærliggjandi er at hugsa, at ogn fer at verða seld ella avhendað fyri at sleppa henni undan panting. Tá kann pantast uttan komuboð.
Eru eingi útlit fyri loysn á eftirstøðuni, ella eru eingi virðir at taka trygd í, verður heitt á Skiftirættin um at taka felagið til trotabúsviðgerð. Tá heldur alt virksemi felagsins uppat, v-talið verður inndrigið, og ogn og skuld verða uppgjørdar.
Bústjóri verður vanliga settur at stýra felagnum, til uppgjørt er, og ognir felagsins eru seldar á tvingsilssølu/uppboðssølu. Innkomin peningur verður lutaður teimum kreditorum, ið hava meldað krav í búnum.