Rindar felag ikki krav innan ásetta freist, sendir TAKS eitt áminningarskriv um eftirstøðuna til felagið. Hetta er skjal, ið lýsir slag og stødd á eftirstøðu, og hvørjar fylgjurnar eru, um hon ikki verður goldin. Ger felagið ikki vart við seg innan 10 dagar eftir at hava móttikið áminningarskrivið, verður málið sent pantifútunum hjá TAKS til innheintingar.

Rindar felag ikki eftirstøðuna, ella setir tað seg ikki í samband við TAKS, eftir at hava fingið áminningarskrivið, ringja vit vanliga til felagið og biðja tað gjalda eftirstøðuna.

Er felagið ikki ført fyri at gjalda, kann tað undirskriva ein skaðaleysan transport í onkrum, sum tað eigur til góðar hjá triðjaparti. Skaðaleysur transportur er skjal, ið verður sent til tann triðjapart, ið felagið eigur okkurt til góðar hjá, har biðið verður um, at allur ella ávísur partur av hesum ágóða verður fluttur beinleiðis til TAKS.

Skaðaleysur transportur er sjálvboðin. Felagið skal undirskriva hann, og ikki er vist, at hann dekkar alla eftirstøðuna. Tískil skal ábyrgdarpersónur fyri felagið skriva undir uppá, at felagið framvegis heftir fyri eftirstøðuna, um ikki alt verður goldið við tí skaðaleysa transportinum.

Skaðaleysur transportur verður bert nýttur í ávísum førum.

Verður skaðaleysur transportur ikki nýttur, ella dekkar inntøkan frá slíkum transporti ikki eftirstøðuna, og felagið framvegis ikki rindar hana innan rímiliga tíð, senda pantifútarnir hjá TAKS eini komuboð. Er talan um álvarsliga skuld, verða tey send beinanvegin.

Komuboð er bræv við boðum um at møta ávísan dag, vanliga á næstu TAKS-skrivstovu. Í brævinum er eisini tilskilað, hvussu nógv, ið felagið skyldar, og hvat ið hendir, um felagið ikki møtir, tí møtiskylda er.

Tá ið møtt verður, verður fyrst spurt, um felagið kann gjalda eftirstøðuna. Kann og ger felagið tað, verður ikki meira gjørt við málið.

Kann felagið ikki gjalda, verður farið víðari við málinum.

Kann felagið ikki gjalda, verður pantað í ognini hjá felagnum, t.d. í tøkum peningi, ógoldnum fakturum, fastogn, akførum, innbúgvi ella øðrum. At ein ogn er pantað merkir, at hon kann ikki seljast ella avhendast uttan við góðkenning frá panthavaranum, í hesum føri TAKS.

Er eingin ogn, ella er hon ov lítil til at panta, kann talan gerast um úrslitaleysa útpanting. Eins og panting hevur úrslitaleys útpanting við sær, at fyrningarfreistin hjá kravinum verður brotin, og tað fyrnast hereftir vanliga fimm ár eftir útpantingina. Nýggj útpanting brýtur aftur hesa fyrningarfreist.

Í serligum førum verður pantað á adressuni hjá felagnum, t.d. um ikki verður møtt til komuboð, ella um vandi er fyri, at felagið selur ella avhendir virðir aðrar vegir. Í seinna føri kann verða pantað, uttan at komuboð verða send.

Eru eingi útlit fyri loysn á eftirstøðuni, og/ella eru eingi virðir at tryggja kravið í, verður áheitan send Skiftirættinum um trotabúsviðgerð. Trotabúsviðgerð merkir, at alt virksemi hjá felagnum heldur uppat, at v-tal verður inndrigið, og at ogn og skuld verða uppgjørdar.

Bústjóri verður vanliga settur at stýra felagnum, til alt er uppgjørt, og til ognir felagsins eru seldar á tvingsilssølu/uppboðssølu. Innkomni peningurin verður útlutaður til teir kreditorar, ið hava meldað krav í búnum.