Í skattalógini stendur, at ókeypis nýtsla av fastogn ella leysafæi og tílíkum er at rokna sum skattskyldig inntøka. Skattskyldig inntøka er alt tað, sum tann skattskyldigi í inntøkuárinum hevur forvunnið í peningi ella peningsvirði, sama um inntøkan stavar úr Føroyum ella ikki.

Lógargreinin fevnir um, at arbeiðsgevarin letur starvsfólk nýta t.d. hús og bilar, sum hann eigur, heilt ella lutvíst ókeypis. Sama er galdandi, har høvuðspartaeigari frá partafelagi hevur ogn til heilt ella lutvísa fría nýtslu.

Í teimum førum, har starvsfólkið kann prógva, at tað hevur goldið arbeiðsgevaranum fyri at nýta ogn hansara, verður virðið á fría ágóðanum lækkað samsvarandi, men ikki niður um 0 kr.

Toll- og skattaráð Føroya ásetir á hvørjum ári nýggjar upphæddir fyri fríar ágóðar. Sí talvu undir snarslóðum.

Fríur bilur er bilur, sum arbeiðsgevari letur starvsfólki at nýta til arbeiðsbrúk og privatbrúk. Fríur bilur er skattskyldigur.

• Fyri 2020 er virðið ásett til at vera 56.800, 65.800, 79.000 og 88.700 kr. fyri bilar, ið viga ávikavist minni enn 1100 kg, frá 1101 til 1300, frá 1301 til 1500 og meira enn 1500.
• Virðið svarar til eina árliga privatkoyring á 10.000 km. Verður koyrt minni, og kann tað prógvast, verður virðið lækkað samsvarandi. Sum prógv kann t.d. nýtast rokniark ella annað skjal, sum greitt vísir býtið millum privata koyring og arbeiðskoyring.
• Upphæddin verður sett í teig 251 í sjálvuppgávuni.

Virðið á fríum ágóðum verður á hvørjum ári ásett av Toll- og skattaráðnum. Undir snarslóðum er talva yvir virðini.

Hvat er munurin á fríum bili og arbeiðsbili?

Fríur bilur kann nýtast til bæði arbeiðsbrúk og privatbrúk. Arbeiðsbilur kann bert nýtast til arbeiðsbrúk, og hann skal hava sjónligt frámerki, til dømis navn ella logo hjá felagnum, sum eigur hann.

Hvat er arbeiðskoyring, og hvat er privatkoyring?

Privatkoyring

Sum privatkoyring verður roknað øll koyring í privatørindum. Koyring millum arbeiðspláss og heim er privatkoyring. Tað verður ikki roknað sum privatkoyring, tá ið starvsfólk í arbeiðskoyring steðgar á fyri at orðna smá privatørindi. Treytin er, at eitt privatørindi ikki er longri enn 200 metrar frá arbeiðsrutuni.

Arbeiðskoyring

Arbeiðskoyring er øll koyring í arbeiðsørindum. Dømi um arbeiðskoyring:

• Koyring við arbeiðsbili í sambandi við starvsfólkatiltøk
• Innkeyp til serlig høvi fyri arbeiðsplássið
• Umboðan
• Átrokandi koyring fyri starvsfólk, t.d. at koyra sjúk starvsfólk heim, hóast hetta kann líkjast privatkoyring.

Hendingakoyring millum heim og arbeiðspláss

Tað er ikki privatkoyring, at starvsfólk í hendingaføri tekur arbeiðsbil við sær til hús. Treytirnar eru, 1) at tað ikki er oftari enn 25 ferðir um árið, 2) at tað orsakað av frástøðu og tíð greitt loysir seg betur fíggjarliga fyri arbeiðsgevaran, 3) at koyrt verður við arbeiðsbilinum heim til bústaðin um kvøldið, og 4) at koyrt verður beinleiðis frá bústaðnum til arbeiðis aftur næsta arbeiðsdag.

Tílík koyring skal altíð vera í samráði við arbeiðsgevaran, og bilurin skal ikki nýtast til privatkoyring annars.

Dømi: Ein sørvingur í Sørvági arbeiðir í Havn. Viðhvørt er fundur á bygd. Nú er fundur í tveir fylgjandi dagar á Flogvøllinum, og sørvingurin koyrir vestur í bilinum hjá arbeiðsgevaranum. Í hesum føri loysir tað seg greitt betur fíggjarliga fyri arbeiðsgevaran, at sørvingurin tekur bilin við heim til hús í Sørvági ímillum hesar báðar fundardagar, heldur enn at koyra aftur til Havnar.

At koyra saman til arbeiðis í arbeiðsbili

At starvsfólk koyra saman til arbeiðis í arbeiðsbili er ikki privatkoyring, um tey fáa løn, frá tí at tey fara í bilin. Tá er talan um koyring í arbeiðstíð í bili arbeiðsgevarans. Víst verður til landsskattanevndaravgerð nr. 05/1992.

Tilkallivakt

Hevur tú arbeiðsbil við heim í sambandi við tilkallivakt, er talan um arbeiðskoyring, tí arbeiðspláss títt er heima við hús, meðan tilkallivaktin er.

Sum tilkallivakt er annars at rokna arbeiðsskipan, har tú fyri samsýning ert bundin at vera tøkur ávíst tíðarskeið uttan fyri vanliga arbeiðstíð. Tilkallivakt skal vera verulig. Er talan t.d. um uppringingarskipan, har tilkalliskyldan kann latast víðari til annan persón, er ikki talan um veruliga tilkallivakt. Talan skal eisini vera um veruligar avmarkingar í privatlívinum. Ein skal t.d. ikki kunna fara longur frá enn eitt vist, ein skal vera úthvíldur, edrúur o.tíl.

Til ber ikki at hava tilkallivakt alt árið. Tá er talan um frían bil, og koyringin í sjálvari tilkallingini er vinnulig og ikki privat.

Koyring hjá sølufólki

Sølufólk koyra ofta langt og byrja dagin hjá einum kunda og enda hann hjá øðrum. Talan er um privatkoyring, tá ið koyrt verður í vanligum bili frá bústaði til fyrsta kunda. Somuleiðis, tá ið koyrt verður frá síðsta kunda og heim.

At læna vøruvognar til starvsfólk

Sum starvsfólk kanst tú hendingaferð læna vøruvogn ella lastbil frá arbeiðsplássinum til at flyta privata ogn, herundir eisini burturkast. Lánið skal einki kosta arbeiðsgevaranum, tí skal hann skriva tær rokning fyri útreiðslur, sum standast av at læna tær bilin, t.e. til brennievni, trygging, skaða, dekkslit og annað. Til at gera hesa rokning ber til at nýta somu upphædd, sum er ásett fyri at nýta egnan bil í arbeiðsørindum. Við seinastu áseting var upphæddin 3,20 pr. km, alt íroknað. Lænir ella leigar tú regluliga tílíkan bil frá arbeiðsplássinum, er talan um frían bil.

Dømi: Starvsfólk lænir vøruvogn til at flyta innbúgv. Frá arbeiðsplássi til bústað til nýggja bústaðin og aftur til arbeiðsplássið eru 52 km. Rokning til starvsfólk: 3,2*52 = 166,4 kr. Mvg er íroknað.

Serútgjørdir bilar

1) Hevur starvsfólk serútgjørdan bil, har amboð, eykalutir o.a. er innbygt í bilin, eins og nevnt á bls. 76 í vegleiðingarskrivinum 1996, verður koyring millum heim og arbeiðspláss ikki roknað sum privatkoyring. Hetta er tó treytað av, at talan er um dagliga skiftandi arbeiðsstøð. Bilurin skal annars ikki verða brúktur til privatkoyring, tí so er talan um frían bil.

2) Um starvsfólk hevur serútgjørdan bil, har amboð, eykalutir o.a. er innbygt í bilin, eins og nevnt á bls. 76 í vegleiðingarskrivinum 1996, og bilurin vanliga ikki kann nýtast til annað enn tað, hann er serútgjørdur til, t.d. saltbilar og oljubilar, verður koyring millum heim og arbeiðspláss ikki roknað sum privatkoyring.

Fríur bústaður er skattskyldigur.

• Fyri 2020 er heilársvirðið ásett til at vera fermetratalið á bústaðnum faldað við 976.
• Hevur ágóðin ikki verið latin í eitt heilt ár, og/ella hevur starvsfólkið goldið ein part sjálvt, skal mótroknast samsvarandi.
• Upphæddin verður sett í teig 291 í sjálvuppgávuni.

Fríur kostur er skattskyldigur.

• Fyri 2020 er dagliga virðið ásett til at vera 36, 47 og 63 kr. fyri ávikavist eina, tvær og tríggjar máltíðir um dagin.
• Viðkomandi krónutal verður faldað við talinum á døgum, ið ein hevur fingið máltíðirnar, og upphæddin verður sett í teig 292 í sjálvuppgávuni.

Fríur hiti er skattskyldigur.

• Fyri 2020 er heilársvirðið ásett til at vera 14.850 kr. fyri upphiting við el ella jarðhita og 25.500 kr. fyri upphiting við olju ella fjarhita.
• Hevur ágóðin ikki verið latin í eitt heilt ár, og/ella hevur starvsfólkið goldið ein part sjálvt, skal mótroknast samsvarandi.
• Upphæddin verður sett í teig 293 í sjálvuppgávuni.

Frítt el er skattskyldigt.

• Fyri 2020 er heilársvirðið ásett til at vera 10.300 kr.
• Hevur ágóðin ikki verið latin í eitt heilt ár, og/ella hevur starvsfólkið goldið ein part sjálvt, skal mótroknast samsvarandi.
• Upphæddin verður sett í teig 294 í sjálvuppgávuni.

Útreiðslur, sum skattgjaldari sparir við sjálvur at gera arbeiði, sum hann annars skuldi goldið øðrum fyri at gera, eru ikki skattskyldig inntøka.

Tó galda hesar reglur:

Handverkarar

Handverkari ella handverksmeistari skal skattast av mistari inntøku svarandi til vanliga arbeiðstíð, tá ið hann leggur starv sítt niður fyri at skapa varandi virðir fyri seg sjálvan ella annan innan fyri egið fak. Sama er, tá ið handverkarar ella handverksmeistarar gera gerðabýti.

Onnur

Fyri aðrar skattgjaldarar er galdandi, at virði á egnum arbeiði verður mett sum skattskyldig inntøka svarandi til vanliga arbeiðstíð, tá ið teir nýta útbúgving ella vinnu sína til at gera eitt arbeiði fyri seg sjálvar, og tað ikki burturav er gjørt í vanligari frítíð.

At gera ókeypis arbeiði

Skattgjaldari, sum ger arbeiði fyri onnur uttan at taka nakað afturfyri, verður ikki skattaður av hesum arbeiði. Arbeiðið er tó at meta sum gáva, ið er skattskyldig hjá móttakaranum.

Trý sløg av fríum ágóðum eru ikki skattskyldigir. Teir eru:

1. privata nýtsluvirðið á teldu við útbúnaði, sum arbeiðsgevari hevur latið starvfólki at ráða yvir í sambandi við arbeiðið,
2. privata nýtsluvirðið á samskifti, sum arbeiðsgevari hevur latið starvfólki at ráða yvir í sambandi við arbeiðið,
3. virðið á fríari ferð og fríum bústaði hjá persóni, sum ikki býr í Føroyum, men sum er í bráðfeingis arbeiðsørindum her.

Við bráðfeingis arbeiðsørindi er at skilja arbeiði, sum samanlagt varir styttri enn 180 dagar í einum 12 mánaða tíðarskeiði, sama um persónurin er burtur ímillum ella ikki.

Best er at seta seg í samband við bókhaldara ella grannskoðara.

Til ber eisini at spyrja kundatænastu okkara

Ring á telefon 35 26 00 mánadag til hósdag millum 10 og 15 ella send eitt teldubræv til taks@taks.fo. Vit vegleiða fegin.