Partafelagssjálvuppgáva
Ein partafelagssjálvuppgáva er eitt yvirlit, sum partafeløg, smápartafeløg, vinnurekandi grunnar og onnur feløg og felagsskapir eina ferð um árið skulu lata TAKS um skattskyldigu inntøku sína, so at roknast kann út, hvussu nógv tey skulu rinda í skatti.
Innlatingarfreistin er hósdagin, 1. juli 2021 |
Feløg, sum eru skrásett hjá Skráseting Føroya
Partafeløg, smápartafeløg og vinnurekandi grunnar
Hesi skulu lata inn partafelagssjálvuppgávu, roknskap, skattligar sundurgreiningar og ársfrásøgn í PDF- og XBRL-formati á Vinnuglugganum. Haðani fara skjølini til avvarðandi myndugleika.
Íverksetarafeløg og partafeløg í roknskaparflokki D
Hesi skulu lata inn partafelagssjálvuppgávu, roknskap, skattligar sundurgreiningar og ársfrásøgn í PDF-formati á Vinnuglugganum. Haðani fara skjølini til avvarðandi myndugleika.
Feløg, sum ikki eru skrásett hjá Skráseting Føroya
Hesi skulu lata inn partafelagssjálvuppgávu í PDF-formati og roknskap í excel-formati á Vinnuglugganum. Roknskapurin skal setast upp eftir einum av roknskaparleistunum hjá TAKS.
Vel "Roknskapur" undir snarslóðum og les alt um roknskap og roknskaparleistir.
Verður latið inn á annan hátt, telur tað sum óinnlatið
Hava tit ikki Vinnugluggan?
Sendið okkum eitt umsóknarblað. Tað liggur undir oyðubløðum her á síðuni. Undir snarslóðum kunnu tit lesa meira um Vinnugluggan.
Verða fullfíggjað partafelagssjálvuppgáva og kapitalvinningssjálvuppgáva ikki rættstundis innlatnar, hevur TAKS heimild til áleggja sekt upp til 5.000 kr. fyri hvørja innlating. Verður framvegis ikki innlatið, metir TAKS um partafelagsskattin og kapitalvinningsskattin og sendir felagnum eitt hoyringsskriv, har tað kann siga sína hugsan um metingina.
Sektin skal altíð rindast.
At søkja um longda innlatingarfreist
Søkjast kann um longda innlatingarfreist, um serlig orsøk er til tess, t.d. sjúka. Sendið tá skrivliga umsókn til TAKS, Postboks 2151, 110 Tórshavn ella til taks@taks.fo. Freistin verður ikki longd út um 15. august.
Gev gætur, at hvør umsókn kann bert galda eitt felag. Tað er krav, at sjálvuppgávur og roknskapir frá eldri árum eru innlatin. Umsóknarfreistin er 30. juni.
Um felag hevur nakað at leggja aftur at útrokningini hjá TAKS av skattinum eitt inntøkuár, skal felagið í seinasta lagi trý ár eftir, at viðkomandi inntøkuár er lokið, leggja fram upplýsingar, sum grundgeva broytingina. Annars fellur kravið burtur.
Best er at seta seg í samband við bókhaldara ella grannskoðara.
Til ber eisini at spyrja kundatænastu okkara
Ring á telefon 35 26 00 mánadag til hósdag millum 10 og 15 ella send eitt teldubræv til taks@taks.fo. Vit vegleiða fegin.