Lurta

Vinningsbýtisuppgerð

Vinnurekandi feløg, ið luta út vinningsbýti til eigarar sínar, skulu lata inn vinningsbýtisuppgerð. Uppgerðin skal vísa, hvør fær vinningsbýti, og hvussu skatturin er roknaður. Verður útlutað til feløg, sum ikki skulu rinda skatt, skal uppgerðin vísa hetta.

Innlatingarfreistin er 14 dagar eftir avgerð um útlutan.

Vinningsbýtisuppgerðin skal tastast inn á Vinnuglugganum

Rita inn á gluggan og vel Sjálvuppgáva > Vinningsbýtisuppgerð.

Verður latið inn á annan hátt, telur tað sum óinnlatið.

Nær, ið útlutan verður roknað sum vinningsbýti og ikki

Útlutan við endaliga avtøku av felagi

  • Verður ikki roknað sum vinningsbýti, um hon verður gjørd í avtøkuárinum.
  • Skal gerast upp eftir reglunum um sølu og aðra avhending.

Útlutan við niðurskriving av partapeningi

  • Verður sum høvuðsregla roknað sum vinningsbýti.
  • Søkjast kann um loyvi til uppgerð eftir reglunum um sølu og aðra avhending.

Útlutan við avhending av partabrøvum til útgevandi felag

  • Verður roknað sum vinningsbýti (øll søluupphæddin).
  • Søkjast kann um loyvi til uppgerð eftir reglunum um vanliga avhending.
Nær, ið skattur verður rindaður av vinningsbýti og ikki

Vinningsbýti er skattafrítt, um:

  • útlutað verður til løgfrøðiligar persónar, sum eru fult skattskyldigir í Føroyum, og sum eiga partapening ella innskotspening í útlutandi felagi
  • útlutað verður til partabrøv, sum útlutandi felag sjálvt eigur

Vinningsbýti er skattskyldigt, um:

  • útlutað verður til likamligar persónar
  • útlutað verður til løgfrøðiligar persónar, sum ikki eru skattskyldigir í Føroyum

Útlutandi felag hevur skyldu at afturhalda skatt av vinningsbýti

Við útlutan til likamligar persónar 35%. Við útlutan til løgfrøðiligar persónar 18%.

Er afturhildin skattur ikki goldin, tá ið freistin er úti, verður hann rentaður við 0,7% fyri hvønn byrjaðan mánað frá rættstundis gjaldsdegnum at rokna.

Brúk fyri hjálp til vinningsbýtisuppgerð?

Best er at seta seg í samband við bókhaldara ella grannskoðara.

Til ber eisini at spyrja kundatænastu okkara. Ring 35 26 00 mánadag til hósdag millum 10 og 12 ella skriva til taks@taks.fo. Vit vegleiða fegin.

Tú kanst eisini bíleggja eitt svar, og vit ringja teg upp aftur, tá tú hevur tíð.

Ongan Vinnuglugga?

Søk um at gerast brúkari

Heinta “Umsókn um at gerast brúkari av Vinnuglugganum” undir oyðubløðum her á síðuni. Fyll umsóknina út og send eina skanning ella mynd av henni:

  • við maili til taks@taks.fo ella
  • við brævi til TAKS, Smyrilsvegur 20, Postboks 2151, 110 Tórshavn

Nakrir fáir dagar, og tú kanst brúka tænastuna. Les meira um hana her.

Ber av serligum orsøkum ikki til at brúka Vinnugluggan?

Lat inn við skjalinum "Vinningsbýtisuppgerð 2025 hjá feløgum". Heinta tað undir oyðubløðum.