Skriva út

Frítíðarløn

Sum arbeiðsgevari hevur tú skyldu til at geva starvsfólki tínum frítíð og frítíðarløn. Tað hevur tú sambært frítíðarlógini.

Hvussu long er frítíðin?

Frítíðin er 30 dagar, um arbeitt hevur verið fulla tíð í innvinningarárinum. Er arbeitt minni, verða tíð og løn tillagaðar samsvarandi.

Innvinningarárið er tíðin, tá ið frítíðarlønin verður upptjent

Vanliga er tað frá 1. apríl til 31. mars. Hjá Felagnum føroyskir sjúkrarøktarfrøðingar tó frá 1. januar til 31. desember.

Hvussu nógv er frítíðarlønin?

Til tímalønt

Tímaløntir løntakarar hava rætt til 12% í frítíðarløn. Frítíðarlønin verður útgoldin 2. mai á hvørjum ári.

Til mánaðarlønt

Mánaðarløntir løntakarar hava rætt til frítíð við vanligari løn + eitt frítíðarískoyti. Les meira um tað í partinum "Frítíðarískoytið".

Hvat er kontunummarið til frítíðarlønina?

Tað veldst um, í hvørjum fakfelagi, starvsfólkið hjá tær er limur.

Starvsfólk, sum eru limir í Felagnum føroyskir sjúkrarøktarfrøðingar

  • 6460 299.909.0

Øll onnur starvsfólk

  • 6460 299.800.0: frítíðarløn við a-inntøku, t.e. vanlig frítíðarløn.
  • 6460 298.808.0: frítíðarløn uttan a-inntøku, t.d. frítíðarløn í sambandi við uppsparda feriu.

Gev gætur, at frítíðarískoytið hjá mánaðarløntum skal ikki flytast á kontu

Arbeiðsgevarar skulu umsita og útgjalda ískoytið sjálvir. Vanliga verður tað útgoldið saman við lønini í apríl.

Nær er síðsta freist at flyta frítíðarløn?

Síðsta freist at flyta frítíðarløn er 31. mars.

Hvussu er við frítíðarløn og uppsøgn?

Starvsfólk, ið verður uppsagt, hevur rætt til 12% í frítíðarløn av inntøkuni, sum tað hevur tjent í innvinningarárinum.

Frítíðarískoytið

Frítíðarískoytið er viðbót, sum mánaðarlønt hava rætt til aftur at vanligu løn síni. Ískoytið er 1,5% av tí, sum er tjent í innvinningarárinum.

Frítíðarískoytið skal ikki rindast á frítíðarlønarkontu

Arbeiðsgevarar skulu umsita og útgjalda ískoytið sjálvir. Vanliga verður tað útgoldið saman við lønini í apríl.

Meira at vita um frítíðarløn?

Klikk á "Frítíðarløn (starvsfólk)" undir snarslóðum og fá meira at vita um møguleikar og mannagongdir hjá starvsfólki tínum í sambandi við frítíðarløn.